ജയ്പൂര്‍: സര്‍ക്കാര്‍ ജോലിയും കുടുംബസ്വത്തും സ്വന്തമാക്കാന്‍ സ്വന്തം അമ്മയെ ക്വട്ടേഷന്‍ സംഘത്തെ ഉപയോഗിച്ച് കൊലപ്പെടുത്തിയെന്ന കേസില്‍ 23-കാരിയായ മകള്‍ ഉള്‍പ്പെടെ ഏഴ് പേരെ രാജസ്ഥാന്‍ പൊലിസ് അറസ്റ്റ് ചെയ്തു. അപകടമെന്ന തോന്നല്‍ സൃഷ്ടിക്കാന്‍ അമിതവേഗത്തിലെത്തിയ എസ്.യു.വി ഇടിപ്പിച്ചുകൊല്ലുകയായിരുന്നുവെന്നാണ് അന്വേഷണത്തില്‍ കണ്ടെത്തിയത്.

മരിച്ചത് കോടതിയിലെ ലോവര്‍ ഡിവിഷന്‍ ക്ലാര്‍ക്കായിരുന്ന 45-കാരി നീരജ് ശര്‍മ്മയാണ്. ജൂലൈ 3-ന് ജയ്പൂരിലെ പ്രതാപ് നഗറില്‍ മകനെ കോച്ചിങ് സെന്ററില്‍ ഇറക്കിവിട്ട് മടങ്ങുന്നതിനിടെയാണ് സ്‌കോര്‍പിയോ എസ്.യു.വി ഇടിച്ചുതെറിപ്പിച്ചത്. സംഭവസ്ഥലത്തുവെച്ച് തന്നെ അവര്‍ മരിച്ചു. വാഹനം നിര്‍ത്താതെ ഡ്രൈവര്‍ രക്ഷപ്പെടുകയും ചെയ്തു.

ALSO READ: എറണാകുളം-കായംകുളം മെമുവില്‍ പുക; യാത്രക്കാരെ പുറത്തിറക്കി

ആദ്യഘട്ടത്തില്‍ അപകടമരണമായാണ് കേസ് പരിഗണിച്ചിരുന്നത്. എന്നാല്‍ സി.സി.ടി.വി ദൃശ്യങ്ങള്‍ പരിശോധിച്ചതോടെ ആസൂത്രിത കൊലപാതകമാണെന്ന സംശയം ശക്തമായി. തുടര്‍ന്ന് നടത്തിയ അന്വേഷണത്തിലാണ് മകളും ബന്ധുക്കളും ക്വട്ടേഷന്‍ സംഘവും ചേര്‍ന്നുള്ള ഗൂഢാലോചന പുറത്തുവന്നത്.

ഭര്‍ത്താവിന്റെ മരണത്തെ തുടര്‍ന്ന് ലഭിച്ച അനുകമ്പ നിയമനത്തിലൂടെ നീരജ് സര്‍ക്കാര്‍ ജോലിയില്‍ പ്രവേശിച്ചിരുന്നു. ആ ജോലി തനിക്ക് ലഭിക്കേണ്ടതായിരുന്നുവെന്നാണ് മകള്‍ ആയുഷി ശര്‍മ്മ കരുതിയിരുന്നതെന്ന് പൊലിസ് പറഞ്ഞു. കുടുംബസ്വത്തുമായി ബന്ധപ്പെട്ട തര്‍ക്കവും കൊലപാതകത്തിന് കാരണമായെന്നാണ് അന്വേഷണസംഘത്തിന്റെ കണ്ടെത്തല്‍.

7 ലക്ഷം പ്രതിഫലം വാഗ്ദാനം ചെയ്ത് ക്വട്ടേഷന്‍ സംഘം ഏര്‍പ്പെടുത്തുകയും ഏകദേശം ഒരു മാസത്തോളം നീരജിന്റെ യാത്രകള്‍ നിരീക്ഷിച്ച ശേഷമാണ് കൊലപാതകം നടപ്പാക്കിയതെന്നും പൊലിസ് വ്യക്തമാക്കി.

കേസില്‍ ആയുഷി ശര്‍മ്മ ഉള്‍പ്പെടെ ഏഴ് പേരെ അറസ്റ്റ് ചെയ്തിട്ടുണ്ട്. ഗൂഢാലോചനയിലെ പ്രധാന പ്രതികളിലൊരാളായ ബല്‍റാം അഥവാ രവി ഒളിവിലാണെന്നും ഇയാള്‍ക്കായി അന്വേഷണം ഊര്‍ജിതമാക്കിയിട്ടുണ്ടെന്നും പൊലിസ് അറിയിച്ചു.

Rajasthan Police have arrested 7 people, including a 23-year-old daughter, in a case where her own mother was allegedly murdered using a contract gang to gain government job and family property.The investigation found that she was killed by an SUV driven at high speed to make it look like an accident.