ലക്‌നൗ: രാജ്യത്തെ പ്രമുഖ ഇസ്‌ലാമിക മതപഠനശാലയായ ദാറുൽ ഉലൂം ദയൂബന്ദിന്റെ പ്രധാന കെട്ടിടത്തിന് കീഴിൽ ശിവക്ഷേത്രമുണ്ടെന്ന് ഹിന്ദുരക്ഷാദൾ. യുപിയിലെ സഹറാൻപൂരിൽ പ്രവർത്തിക്കുന്ന സ്ഥാപനത്തിൽ സർക്കാർ പരിശോധന നടത്തണമെന്നും ഇല്ലെങ്കിൽ കോടതിയെ സമീപിക്കുമെന്നും ഹിന്ദുരക്ഷാദൾ പ്രവർത്തകർ ആവശ്യപ്പെട്ടു. സമയബന്ധിതമായി അന്വേഷണം പൂർത്തിയാക്കണമെന്ന് ആവശ്യപ്പെട്ട് സംഘടന ജില്ലാ ഭരണകൂടത്തിന് പരാതി നൽകി. 

വിഷയത്തിൽ നേരത്തെ പരാതി നൽകിയിരുന്നെങ്കിലും നടപടിയെടുത്തില്ല. ഒരുമാസത്തിനകം പരിശോധന നടത്തിയില്ലെങ്കിൽ ഹിന്ദുരക്ഷാ ദളിന്റെ നേതൃത്വത്തിൽ ദാറൂൽ ഉലൂമിൽ ജലാഭിഷേകം നടത്തുമെന്ന് സംഘടന സംസ്ഥാന പ്രസിഡന്റ് ലളിത് ശർമ ഭീഷണിപ്പെടുത്തി. ചടങ്ങിനായി ശിവ ഭക്തരുടെ നേതൃത്വത്തിൽ ഹരിദ്വാറിൽ നിന്ന് ഗംഗാജലം കൊണ്ടുവരുമെന്നും, ഏത് നടപടിയും നേരിടാൻ തയ്യാറാണെന്നും ലളിത് ശർമ പറഞ്ഞു. 

ശിവക്ഷേത്രവുമായി ബന്ധപ്പെട്ട് തങ്ങളുടെ പക്കൽ തെളിവുണ്ടെന്ന് ശർമ അവകാശപ്പെട്ടു. എന്നാൽ മാധ്യമങ്ങൾക്ക് മുന്നിൽ തെളിവ് ഹാജരാക്കാൻ സാധിക്കില്ലെന്നും കോടതിയിൽ തെളിയിക്കുമെന്നും ശർമ പറഞ്ഞു. ജില്ലാ ഭരണകൂടം വിഷയത്തിൽ ഇടപെട്ടില്ലെങ്കിൽ കോടതിയിൽ പൊതുതാൽപര്യ ഹരജി സമർപ്പിക്കാനാണ് സംഘടനയുടെ നീക്കം. 

hindu raksha dal claims that there is a shiva temple beneath the main building of darul uloom deoband.