തളിപ്പറമ്പ് : ആവേശത്തിരയിളക്കി കുപ്പം പുഴയില്‍ നടന്ന രണ്ടാമത് ജലോത്സവം സമാപിച്ചു. മുക്കുന്ന് ഗ്രാമവേദി ആര്‍ട്‌സ് ആന്റ് സ്‌പോര്‍ട്‌സ് ക്ലബ്ബും ജില്ലാ ടൂറിസം പ്രമോഷന്‍ കൗണ്‍സിലും സംയുക്തമായി സംഘടിപ്പിച്ച വള്ളംകളി മത്സരം ഇന്നലെ വൈകുന്നേരം നാലു മണിയോടെ കുപ്പം പുഴയില്‍ പരിയാരം ഗ്രമാപഞ്ചായത്തംഗം കെ.പി സല്‍മത്ത് ഫ്‌ളാഗ് ഓഫ് ചെയ്തു.
മത്സരം വീക്ഷിക്കാന്‍ പുഴയുടെ ഇരുകരകളിലും വന്‍ജനാവലി തടിച്ചുകൂടിയിരുന്നു. 25 പേര്‍ തുഴയുന്ന ചുരുളന്‍ വള്ളങ്ങളുടെ മത്സരത്തില്‍ എ.കെ.ജി കോറോതുരുത്തി ഒന്നാം സ്ഥാനവും, വയക്കര മയിച്ച രണ്ടാം സ്ഥാനവും, എ.കെ.ജി മയിച്ച മൂന്നാം സ്ഥാനവും കരസ്ഥമാക്കി.
15 പേര്‍ തുഴയുന്ന വള്ളങ്ങളുടെ മത്സരത്തില്‍ എ.കെ.ജി മയിച്ച എ ടീം ഒന്നാം സ്ഥാനവും, എ.കെ.ജി കോറോതുരുത്തി രണ്ടാം സ്ഥാനവും, കൃഷ്ണപ്പിള്ള കാവുംചിറ മൂന്നാം സ്ഥാനവും കരസ്ഥമാക്കി. അഞ്ചു പേര്‍ തുഴയുന്ന നാടന്‍ വള്ളങ്ങളുടെ മത്സരത്തില്‍ വീവണ്‍ താവം ഒന്നാം സ്ഥാനവും, ഇ.എം.എസ് കള്‍ച്ചറല്‍ സെന്റര്‍ കുറ്റ്യേരി രണ്ടാം സ്ഥാനവും, ഡിഫന്‍ഡേഴ്‌സ് കുപ്പം മൂന്നാം സ്ഥാനവും കരസ്ഥമാക്കി. നാടന്‍ വള്ള മത്സരത്തിനിടയില്‍ വള്ളങ്ങള്‍ മറിഞ്ഞത് കാണികളില്‍ പരിഭ്രാന്തി പരത്തി. തക്കസമയത്ത് രക്ഷാ പ്രവര്‍ത്തനം നടത്തിയതിനാല്‍ ആളപായം ഒഴിവായി.
ജയിംസ് മാത്യു എം.എല്‍.എ സമ്മാനവിതരണവും, സമാപന സമ്മേളനം ഉദ്ഘാടനവും ചെയ്തു. പരിയാരം ഗ്രാമപഞ്ചായത്ത് പ്രസിഡണ്ട് എ രാജേഷ് അധ്യക്ഷത വഹിച്ച ചടങ്ങില്‍ സജി വര്‍ഗീസ്, പി രഞ്ജിത്ത്, കെ സന്തോഷ്, ഇബ്രാഹിംകുട്ടി തിരുവട്ടൂര്‍, പി സല്‍മത്ത്, കെ.കെ മധു, ഇ.പി രാജീവന്‍ സംസാരിച്ചു.  തുടര്‍ന്ന് വിവിധ കലാപരിപാടികളും, സംഗീതനിശയും അരങ്ങേറി.