മേപ്പാടി: സ്വകാര്യ വ്യക്തികളുടെ കൈയില്‍ നിന്നും പിടിച്ചെടുത്ത പഴയ മത്സ്യ മാര്‍ക്കറ്റ് ഇനി മുതല്‍ കുടുംബശ്രീക്ക് സ്വന്തം. പഞ്ചായത്ത് കുടുംബശ്രീ സി.ഡി.എസിന് കെട്ടിടം നിശ്ചിത വാടകക്ക് നല്‍കുകയായിരുന്നു. വര്‍ഷങ്ങളോളം പഞ്ചായത്തിന് വാടക നല്‍കി കച്ചവടം നടത്തുന്നതിനിടയില്‍ വ്യാപാരികളില്‍ ചിലര്‍ കെട്ടിടം സ്വന്തമാക്കാന്‍ ശ്രമിച്ചു.
നിലവില്‍ കോടതിയില്‍ കേസ് നിലനില്‍ക്കുകയാണ്. ഇതിനിടയില്‍ പഞ്ചായത്ത് മുന്‍കൈയെടുത്ത് വ്യാപാരികളുടെ സഹകരണത്തോടെ തന്നെ കെട്ടിടം ഏറ്റെടുക്കുകയായിരുന്നു. കുടുംബശ്രീ യൂനിറ്റുകള്‍ തയ്യാറാക്കുന്ന ഉല്‍പന്നങ്ങള്‍, ജൈവ പച്ചക്കറികള്‍ എന്നിവ ചന്തയില്‍ വില്‍ക്കും.
ഗ്രാമ പഞ്ചായത്ത് പ്രസിഡന്റ് കെ.കെ സഹദ് ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ സീനത്ത്, പഞ്ചായത്തംഗങ്ങളായ ടി.കെ സുലൈമാന്‍, സഹിഷ്ണ, സി.ഡി.എസ് ചെയര്‍പേഴ്‌സണ്‍ മിനി സംസാരിച്ചു.