കുന്നുംകൈ: എട്ടു വര്‍ഷം മുന്‍പ് പ്രവര്‍ത്തനമാരംഭിച്ച നല്ലോമ്പുഴ വൈദ്യുതി സെക്ഷന്‍ ഓഫിസ് അസൗകര്യങ്ങളാല്‍ വീര്‍പ്പുമുട്ടുന്നു. ഈസ്റ്റ് എളേരി, വെസ്റ്റ് എളേരി,ബളാല്‍ പഞ്ചായത്തുകളിലെ വൈദ്യുതിയുടെ ചുമതലയാണ് ഈ സെക്ഷന്‍ ഓഫിസിനുള്ളത്.
 മലയോരമേഖലയിലെ 11,000 ത്തിലധികം ഉപഭോക്താക്കളാണ് ഈ സെക്ഷന്‍ പരിധിയിലുള്ളത്. ഇടുങ്ങിയ മുറികളില്‍ ഊഴമിട്ടാണ് ജീവനക്കാര്‍ ജോലി ചെയ്യുന്നത്. ബില്ലടക്കാനെത്തുന്നവര്‍ മഴയും വെയിലും സഹിച്ച് പുറത്ത് നില്‍ക്കണം. സ്ഥലസൗകര്യമില്ലാത്തതിനാല്‍ വൈദ്യുതീകരണ ഉപകരണങ്ങള്‍ റോഡരികില്‍ കൂട്ടിയിട്ടിരിക്കുന്നത് കാരണം പലപ്പോഴും ഗതാഗതം തടസമാകുന്നു. ഇവ മോഷണം പോകാതിരിക്കാന്‍ രാത്രികാലങ്ങളില്‍ ജീവനക്കാര്‍ കാവലിരിക്കേണ്ട അവസ്ഥയിലാണ്. രാത്രി ഡ്യൂട്ടി ചെയ്യുന്നവര്‍ക്ക് തലചായ്ക്കാന്‍ പോലും  സൗകര്യങ്ങള്‍  ഈ കെട്ടിടത്തിലില്ല. കംപ്യൂട്ടറൈസേഷനും കെ.എസ്.ഇ.ബി സോഫ്റ്റ് വെയര്‍ ഒരുമയും നടപ്പാക്കാനുള്ള കംപ്യൂട്ടറും അനുബന്ധ ഉപകരണങ്ങളും എത്തിയിട്ടുണ്ടെങ്കിലും സ്ഥലസൗകര്യമില്ലാത്തതിനാല്‍ പദ്ധതികളൊന്നും നടപ്പാക്കാന്‍ കഴിയുന്നില്ല. സ്വകാര്യ വ്യക്തിയുടെ വാടകക്കെട്ടിടത്തിലാണ് എട്ടുവര്‍ഷമായി ഈ ഓഫിസ് പ്രവര്‍ത്തിക്കുന്നത്. സാങ്കേതിക കാരണങ്ങളാല്‍ കെട്ടിട ഉടമയ്ക്ക് വാടക ലഭിക്കുന്നില്ല. കെട്ടിടമൊഴിയാന്‍ ഉടമ ആവശ്യപ്പെട്ടാല്‍ ഓഫിസിന്റെ പ്രവര്‍ത്തനം തന്നെ നിലയ്ക്കും. സെക്ഷന്‍ ഓഫിസ് കൊണ്ടുവന്നതല്ലാതെ കെട്ടിടവും മറ്റ് സൗകര്യങ്ങളുമൊരുക്കാന്‍ ജനപ്രതിനിധികള്‍ ഇടപെടാത്തതാണ് എട്ടുവര്‍ഷമായിട്ടും ഈ ഓഫിസ് ഇങ്ങനെ തുടരാന്‍ കാരണമെന്നു നാട്ടുകാര്‍ പറയുന്നു. പുതിയ കെട്ടിടം ഒരുക്കി തങ്ങളുടെ ആശങ്ക അകറ്റണമെന്നാണ് ജീവനക്കാരുടെ ആവശ്യം.