ചങ്ങരംകുളം: ചങ്ങരംകുളത്തെ പൊന്നാനി എക്‌സൈസ് റേഞ്ച് ഓഫിസ് 20 വര്‍ഷത്തോളമായി പ്രവര്‍ത്തിക്കുന്നതു വാടകക്കെട്ടിടത്തില്‍. നിലവില്‍ പിടിച്ചെടുക്കുന്ന വാഹനങ്ങളും മദ്യവും മറ്റും സൂക്ഷിച്ചുവയ്ക്കുന്നതും ഓഫിസ് ജോലികള്‍ നടക്കുന്നതും ഒറ്റ മുറിയിലാണ്. പിടിച്ചെടുത്ത നിരവധി ബൈക്കുകളാണ് റൂമിലും വരാന്തയിലുമായി ഉള്ളത്.
കേസില്‍ പിടികൂടുന്നവരെ തടവിലാക്കുന്ന സെല്ലിന്റെ കാര്യവും പരിതാപകരമാണ്. ഈ കെട്ടിടത്തിന്റെ പെയിന്റിങ് ജോലികള്‍ നടത്തിയിട്ടു വര്‍ഷങ്ങളായി. കെട്ടിടത്തിന്റെ പല ഭാഗങ്ങളും ഇടിഞ്ഞുവീഴുന്നതും പതിവാണ്.  മദ്യക്കുപ്പികളും വാഹനങ്ങളും നിറഞ്ഞ ഓഫിസില്‍ ശ്വാസംമുട്ടി കഴിയുകയാണ് ജീവനക്കാര്‍. പ്രദേശത്തെ സ്‌കൂള്‍ കേന്ദ്രീകരിച്ചു ലഹരിമാഫിയ പിടിമുറുക്കുമ്പോള്‍ ചങ്ങരംകുളത്തെ എക്‌സൈസ് ഓഫിസിന്റെ അവസ്ഥ ആശങ്കയോടെയാണ് നാട്ടുകാര്‍ കാണുന്നത്.