പൊന്നാനി: പൊന്നാനി എം.ഇ.എസ് കോളജ് നേതൃത്വം നല്‍കുന്ന ഗേള്‍സ് വിത്ത് ഗോള്‍സ് പദ്ധതി തുടങ്ങി. പഠനത്തില്‍ മുന്നോക്കം നില്‍ക്കുന്ന തീരദേശത്തെ പെണ്‍കുട്ടികളെ ദത്തെടുത്ത് അവര്‍ക്കാവശ്യമായ പഠനാന്തരീക്ഷവും സാമ്പത്തിക സഹായവും നല്‍കി സമൂഹത്തിന്റെ മുഖ്യധാരയിലേക്ക് ഉയര്‍ത്തിക്കൊണ്ടുവരുന്നതാണ് പദ്ധതി. നേരത്തേ ഇക്കണോമിക്‌സ് വകുപ്പ് നടത്തിയ പഠനറിപ്പോര്‍ട്ടുകളുടെ അടിസ്ഥാനത്തില്‍ തീരദേശ മേഖലയിലെ പെണ്‍കുട്ടികള്‍ പ്രൊഫഷണല്‍ വിദ്യാഭ്യാസത്തില്‍ പിറകോട്ടടിക്കുന്നതിന് പരിഹാരം കാണുന്ന യജ്ഞത്തിനാണ് തുടക്കംകുറിച്ചത്.
തീരദേശത്തെ വിവിധ സ്‌കൂളുകളില്‍നിന്നു തെരഞ്ഞെടുത്ത 20 വിദ്യാര്‍ഥികള്‍ക്ക് സേവിങ്‌സ് പാസ്ബുക്കുകള്‍ നല്‍കി. അഞ്ചു വര്‍ഷത്തേക്കാണ് വിദ്യാര്‍ഥികളെ ദത്തെടുത്തിരിക്കുന്നത്. തെരഞ്ഞെടുത്ത വിദ്യാര്‍ഥികള്‍ക്ക് ആവശ്യമായ മോട്ടിവേഷന്‍ ക്ലാസും മറ്റു പഠന സൗകര്യങ്ങളും ഇക്കണോമിക്‌സ് ഡിപ്പാര്‍ട്ട്‌മെന്റ് നല്‍കും.
പദ്ധതിയുടെ ഉദ്ഘാടനം നഗരസഭാ ചെയര്‍മാന്‍ സി.പി മുഹമ്മദ്കുഞ്ഞി നിര്‍വഹിച്ചു. പ്രിന്‍സിപ്പല്‍ ഡോ. ടി.പി അബ്ബാസ്, കെ.പി മറിയുമ്മ, പ്രൊഫ. വി.കെ ബേബി, സി.ടി അബൂബക്കര്‍, ശിവരാമന്‍, വി.പി സൈതലവി സംസാരിച്ചു.