ഒലവക്കോട്: അഹിംസയും ശാന്തിയും ലക്ഷ്യമാക്കിയുള്ള ജീവിതദര്‍ശനമാണ് മഹാത്മജി ലോകത്തിന് സമ്മാനിച്ചതെന്നും അവയെ കൈവെടിയുന്നിടങ്ങളിലെല്ലാം സര്‍വ്വനാശത്തിന്റെ ദുരിതങ്ങളനുഭവിക്കേണ്ടി വന്നിട്ടുണ്ടെന്നും മഹാരാഷ്ട്ര മുന്‍ ഗവര്‍ണര്‍ കെ.ശങ്കരനാരായണന്‍ അഭിപ്രായപ്പെട്ടു.
ഏവര്‍ക്കും അവകാശപ്പെട്ട വിഭവങ്ങളില്‍ നിന്നും അളവില്‍ കവിഞ്ഞ് കൈവശപ്പെടുത്തുന്നതാണ് ദാരിദ്ര്യത്തിനു കാരണമെന്നും ഇത് പൊറുക്കാനാവാത്ത ഹിംസയാണെന്നും അദ്ദേഹം പറഞ്ഞു.
ഇന്നലെ ധോണി ലീഡ് കോളജില്‍ ഗാന്ധിദര്‍ശന്‍ സമിതി സംഘടിപ്പിച്ച ഗാന്ധിദര്‍ശന്‍ ക്യാംപും സെമിനാറും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ഗാന്ധിദര്‍ശന്‍ സമിതി ചെയര്‍മാന്‍ വി.സി.കബീര്‍ മാസ്റ്ററുടെ അധ്യക്ഷതയില്‍ നടന്ന സമ്മേളനത്തില്‍ പ്രൊഫ.പി.എ.വാസുദേവന്‍ വിഷയം അവതരിപ്പിച്ചു.
നിലനില്‍പ്പിന്റെ സമ്പദ് വ്യവസ്ഥയും അക്രമരഹിത സമൂഹവും എന്ന വിഷയത്തെക്കുറിച്ചുള്ള സെമിനാറില്‍ പുതുശ്ശേരി ശ്രീനിവാസന്‍ മോഡറേറ്ററായി. പി.എ.രമണിഭായ്, ഡോ.കെ.തോമസ് ജോര്‍ജ്, എസ്.വിശ്വകുമാരന്‍ നായര്‍, പി.എസ് മുരളീധരന്‍, ബൈജു വടക്കുംപുറം തുടങ്ങിയവര്‍ സംസാരിച്ചു.