മാള: ചരിത്ര സ്മാരകമായ മാളയിലെ യഹൂദ സെമിത്തേരിയില്‍ അനധികൃതമായി നിര്‍മിച്ച മതില്‍ പൊളിച്ചുമാറ്റി. കഴിഞ്ഞ ജൂണ്‍ 28 ന് നിര്‍മിച്ച മതിലാണ് മാള ഗ്രാമപഞ്ചായത്തിന്റെ നേതൃത്വത്തില്‍ പൊളിച്ചു മാറ്റിയത്. ജില്ലാ നിര്‍മിതി കേന്ദ്രത്തിന്റെ നേതൃത്വത്തില്‍ പണിത മതിലാണ് ഇന്നലെ ഉച്ചക്ക് ശേഷം മൂന്ന് മണിയോടെ ജെ.സി.ബി ഉപയോഗിച്ച് പൊളിച്ചത്. 90 മീറ്ററോളം നീളത്തിലും 1.75 മീറ്റര്‍ ഉയരത്തിലും പണിത മതില്‍ വലിയ തോതിലുള്ള പരാതികള്‍ക്കിട നല്‍കിയിരുന്നു.
പണി ഭാഗികമായി പൂര്‍ത്തീകരിച്ച ഇന്‍ഡോര്‍ സ്റ്റേഡിയത്തിന് സമീപത്തായി പഴയ മതിലില്‍ നിന്നും നാലടിയോളം ഉള്ളിലേക്ക് വലിച്ചാണ് മതില്‍ നിര്‍മിച്ചത്. കഴിഞ്ഞ സര്‍ക്കാരിന്റെ കാലത്ത് സ്റ്റേഡിയം നിര്‍മാണത്തിനായി കേരള സ്‌പോര്‍ട്‌സ് കൗണ്‍സിലിനും ജില്ലാ നിര്‍മിതി കേന്ദ്രത്തിനുമായി ഉടമ്പടി പ്രകാരം വിട്ടു നല്‍കിയ ഭൂമിയില്‍ ഇന്‍ഡോര്‍ സ്റ്റേഡിയം നിര്‍മാണത്തോടൊപ്പം മതില്‍ നിര്‍മാണത്തിനായി താഴെ നിന്നും നാലടിയിലേറെ ഉയരത്തില്‍ കോണ്‍ഗ്രീറ്റ് ചെയ്ത് മതിലിന്റെ പ്രധാന ഭാഗം നിര്‍മിച്ചിരുന്നു. മാള ഗ്രാമപഞ്ചായത്ത് പ്രസിഡന്റ് പി.കെ സുകുമാരന്‍, വൈസ് പ്രസിഡന്റ് ബിന്ദു ബാബു തുടങ്ങി ഗ്രാമപഞ്ചായത്തംഗംങ്ങളുടെ നേതൃത്വത്തിലാണ് മതില്‍ പൊളിക്കല്‍ നടന്നത്.
ഇതിനിടെ പഞ്ചായത്ത് സെക്രട്ടറി അറിയാതെയാണ് മതില്‍ പൊളിക്കല്‍ നടന്നതെന്ന് ആക്ഷേപമുണ്ട്. മതില്‍ പൊളിക്കല്‍ മൂലം സര്‍ക്കാരിനും ഗ്രാമപഞ്ചായത്തിനും മൂന്ന് ലക്ഷം രൂപയുടെ നഷ്ടമുണ്ടായിട്ടുണ്ടെന്നാണ് യു.ഡി.എഫിന്റെ പരാതി. ഇന്‍ഡോര്‍ സ്റ്റേഡിയത്തിന്റെ ഇരുമ്പ് തൂണിന് ക്ഷതമേറ്റിട്ടുണ്ടെന്നും ശുചിമുറിയിലേക്കുള്ള പൈപ്പുകള്‍ തകര്‍ന്നു പോയതായും പഴയ ചുറ്റുമതിലിന്റെ 15 മീറ്ററോളം ഭാഗം മറിഞ്ഞ് വീണതായുമാണ് പരാതി. ഇത് സംബന്ധിച്ച് പഞ്ചായത്ത് സെക്രട്ടറിക്ക് യു.ഡി.എഫ് പരാതി നല്‍കി. 1954 ല്‍ യഹൂദര്‍ ഇസ്രയേലിലേക്ക് പോയപ്പോള്‍ ഗ്രാമപഞ്ചായത്തിനെ ഏല്‍പ്പിച്ച് പോയ ശ്മശാനഭൂമിയില്‍ 2001, 2006 കാലഘട്ടത്തിലുള്ള ഭരണസമിതി കയ്യേറ്റം നടത്തിയാണ് മിനി സ്റ്റേഡിയം നിര്‍മിച്ചത്. അതിന് ശേഷം വിവാദങ്ങള്‍ പുകയുകയാണ്.