കോഴിക്കോട്: ഒക്‌ടോബര്‍ ആറു മുതല്‍ എട്ടുവരെ കോഴിക്കോട്ട് നടക്കുന്ന മുസ്‌ലിം യൂത്ത് ലീഗ് സംസ്ഥാന സമ്മേളനത്തില്‍ ദലിത് പ്രക്ഷോഭ നായകന്‍ ജിഗ്നേഷ് മേവാനി പങ്കെടുക്കും. ഗുജറാത്തിലെ ദലിത് പ്രക്ഷോഭ നായകനായ ജിഗ്നേഷ് മേവാനിയെ മോദിയുടെ പിറന്നാളാഘോഷവുമായി ബന്ധപ്പെട്ട് ഗുജറാത്ത് പൊലിസ് അറസ്റ്റ് ചെയ്തതും സമ്മര്‍ദങ്ങള്‍ക്കൊടുവില്‍ വിട്ടയക്കേണ്ടി വന്നതും വലിയ വിവാദമായിരുന്നു. കണ്ണൂരില്‍ സി.പി.എം അനുകൂല സംഘടന നടത്തിയ പരിപാടിയില്‍ നിന്നും മേവാനി പിന്‍വാങ്ങിയിരുന്നു.

ഒക്‌ടോബര്‍ ആറിന് കോഴിക്കോട് ടാഗോര്‍ സെന്റിനറി ഹാളില്‍ നടക്കുന്ന പ്രതിനിധി സമ്മേളനത്തില്‍ ജിഗ്നേഷ് മേവാനി മുഖ്യാതിഥിയായിരിക്കും. രണ്ടാം ദിവസം നടക്കുന്ന പിന്നോക്ക - ന്യൂനപക്ഷ - ദലിത് ഐക്യം ആസ്പദമാക്കി നടക്കുന്ന സെമിനാറിലും ഇദ്ദേഹം പങ്കെടുക്കും. കണ്ണൂരില്‍ സി.പി.എം പീഡനങ്ങള്‍ക്ക് ഇരയാകേണ്ടി വന്ന ദലിത് വനിതയായ ചിത്രലേഖയും സെമിനാറില്‍ സംബന്ധിക്കുമെന്ന് മുസ്‌ലിം യൂത്ത് ലീഗ് സംസ്ഥാന പ്രസിഡന്റ് പി.എം സാദിഖലിയും ജനറല്‍ സെക്രട്ടറി സി.കെ സുബൈറും അറിയിച്ചു.