മൈസൂരു: കാവേരി നദീജല തര്‍ക്കവുമായി ബന്ധപ്പെട്ടുണ്ടായ സംഘര്‍ഷത്തിന്റെ മറവില്‍ ലോറി ജീവനക്കാരെ ആക്രമിച്ച് കൊള്ളയടിച്ചു. കാസര്‍കോട് സ്വദേശികളായ ഡ്രൈവര്‍ ആസിഫ്, ക്ലീനര്‍ ഷബീബ് എന്നിവരെയാണ് ആക്രമിച്ചത്. കഴിഞ്ഞദിവസം രാത്രി മൈസൂരുവിനടുത്തുള്ള മാണ്ഡ്യയിലാണ് സംഭവം. കാറിലെത്തിയ അഞ്ചംഗസംഘമാണ് സംഭവത്തിനുപിന്നില്‍.
ഗ്രാനൈറ്റുമായി കേരളത്തിലേക്കു വരികയായിരുന്ന ലോറി ബ്രേക്ക് തകരാറിലായതിനെ തുടര്‍ന്ന് പാതക്കരികില്‍ നിര്‍ത്തിയിട്ടതായിരുന്നു. ഗ്രാനൈറ്റിനൊപ്പം ലോറിയിലുണ്ടായിരുന്ന ഫിനോലെക്‌സ് കമ്പനിയുടെ വയര്‍, ജീവനക്കാരുടെ മൊബൈല്‍ ഫോണുകള്‍, ഇവരുടെ കൈയിലുണ്ടായിരുന്ന 3,000 രൂപ എന്നിവയാണ് അക്രമികള്‍ കൊള്ളയടിച്ചത്. 80,000 രൂപയോളം വിലവരുന്ന നാല് ചാക്ക് വയറുകളാണ് ലോറിയിലുണ്ടായിരുന്നത്. 25,000 രൂപ വിലവരുന്നതാണ് ഇവരുടെ കൈയിലുണ്ടായിരുന്ന മൊബൈല്‍ ഫോണുകള്‍. കാറിലെത്തിയ സംഘം ലോറി ജീവനക്കാരെ ക്രൂരമായി തല്ലിച്ചതച്ച ശേഷമാണ് മോഷണം നടത്തിയത്.
സംഭവവുമായി ബന്ധപ്പെട്ട് ലോറി ഡ്രൈവര്‍ നല്‍കിയ പരാതിയില്‍ മാണ്ഡ്യ റൂറല്‍ പൊലിസ് കേസെടുത്ത് അന്വേഷണം തുടങ്ങി. കാവേരി സംഘര്‍ഷത്തെതുടര്‍ന്ന് കര്‍ണാടകയില്‍നിന്ന് കേരളത്തിലേക്കും മറ്റും വരുന്ന വാഹനങ്ങള്‍ രാത്രിസമയത്ത് തടഞ്ഞുനിര്‍ത്തി വിലപിടിപ്പുള്ള സാധനങ്ങളും പണവും കൊള്ളയടിക്കുന്ന സംഘം മാണ്ഡ്യ കേന്ദ്രീകരിച്ച് പ്രവര്‍ത്തിക്കുന്നതായി വ്യാപക പരാതിയുയര്‍ന്നിട്ടുണ്ട്.