പൂച്ചാക്കല്‍:സ്‌കൂളിന് സമീപത്തെ  റോഡ് സഞ്ചാരയോഗ്യമാക്കണമെന്നവശ്യപ്പെട്ട് നാലാം ക്‌ളാസ് വിദ്യാര്‍ത്ഥി ജനപ്രതിനിധികള്‍ക്ക് നിവേദനം നല്‍കി.
വടുതല നദ് വത്തുല്‍ ഇസ്ലാം ഇംഗ്‌ളീഷ് മീഡിയം സ്‌കൂളിലെ വിദ്യാര്‍ത്ഥി മുഹമ്മദ് റസിനാണ് ജില്ലാ പഞ്ചായത്ത് വൈസ് പ്രസിഡന്റ് ദലീമ ജോജോക്കും,
തൈക്കാട്ടുശ്ശേരി പഞ്ചായത്ത് പ്രസിഡന്റ് നിര്‍മ്മലാ ശെല്‍വരാജിനും നിവേദനം സമര്‍പ്പിച്ചത്.
അരൂക്കുറ്റി പഞ്ചായത്ത് പത്താം വാര്‍ഡ് നദ്‌വത്ത് നഗര്‍താമരച്ചാല്‍ക്കരി റോഡ് സ്‌കൂളിന്റെയും അനാഥാലയത്തിനും സമീപത്ത് കൂടിയാണ് കടന്നു പോകുന്നത്. വിദ്യാര്‍ഥികളടക്കം ധാരാളം പേര്‍ ആശ്രയിക്കുന്ന റോഡ് മാസങ്ങളായി തകര്‍ന്നു കിടക്കുകയാണ്.
മാസങ്ങള്‍ക്ക് മുമ്പ് റോഡിലെ കുഴിയില്‍ വീണ് മുഹമ്മദ് റസിന് പരിക്കേറ്റിരുന്നു തുടര്‍ന്ന് വിദ്യാര്‍ത്ഥിയും പിതാവും നാട്ടുകാരും റോഡില്‍ കുത്തിയിരിപ്പ് സമരം നടത്തുകയും റോഡ് ഉടനെ പുനര്‍നിര്‍മ്മിക്കാമെന്ന അധികൃതരുടെ ഉറപ്പില്‍മേല്‍ സമരം അവസാനിപ്പിക്കുകയും ചെയ്തു.എന്നാല്‍ നാളുകള്‍ കഴിഞ്ഞിട്ടുംതുടര്‍ നടപടികളൊന്നും ഉണ്ടാകാത്തതിനെ തുടര്‍ന്നാണ് ജനപ്രതിനിധികള്‍ക്ക് നിവേദനം നല്‍കിയത്.
വടുതല റൂറല്‍ പബ്ലിക് ലൈബ്രറി,ജനമുന്നേറ്റ സമിതി  ഭാരവാഹികളായ പി.എം.സുബൈര്‍,അഡ്വ.അബ്ദുല്‍മാലിക്,പി.ആര്‍.ബാബു,കെ.എം.സുഹൈല്‍,സക്കരിയ്യ വടുതല,കെ.എം.അബ്ദുല്‍ഖാദര്‍,  തുടങ്ങിയവര്‍ വിദ്യാര്‍ഥിക്ക് പിന്തുണ നല്‍കി.