കോഴിക്കോട്: കേരളത്തില്‍ ബി.ജെ.പി പ്രവര്‍ത്തകര്‍ക്കുനേരെയുള്ള സി.പി.എം അക്രമങ്ങള്‍ക്കു സര്‍ക്കാര്‍ സംരക്ഷണമുണ്ടെന്ന്  ബി.ജെ.പി ദേശീയ അധ്യക്ഷന്‍ അമിത് ഷാ. മുഖ്യമന്ത്രിയുടെ നാട്ടില്‍പോലും ക്രൂരമായ ആക്രമണങ്ങള്‍ അരങ്ങേറുന്നത് ചോദ്യചിഹ്നം ഉയര്‍ത്തുന്നു.
കമ്മ്യൂണിസ്റ്റുകളുടെ നേതൃത്വത്തില്‍ ബി.ജെ.പിക്കെതിരേ നടക്കുന്ന ഇത്തരം ചെയ്തികള്‍ കേരളത്തിലെ ജനാധിപത്യ ചരിത്രത്തിന് അപമാനവും തീരാകളങ്കവുമാണെന്നും അദ്ദേഹം പറഞ്ഞു. കോഴിക്കോട് കടപ്പുറത്ത് ബി.ജെ.പി ദേശീയ കൗണ്‍സിലിനോടനുബന്ധിച്ച് നടന്ന പൊതുസമ്മേളനത്തില്‍ പ്രസംഗിക്കുകയായിരുന്നു അമിത് ഷാ.
  ഇടതുസര്‍ക്കാര്‍ അധികാരത്തിലേറിയശേഷം കേരളത്തില്‍ ബി.ജെ.പി പ്രവര്‍ത്തകര്‍ക്കെതിരേ വ്യാപകമായ ആക്രമണങ്ങളാണ് നടന്നത്.
കേന്ദ്രം ഭരിക്കുന്ന മോദി സര്‍ക്കാരിന്റെ പ്രവര്‍ത്തനങ്ങള്‍ ജനങ്ങളിലെത്തുന്നത് തടയാനാണ് ആക്രമണങ്ങളെങ്കില്‍ എത്രപേരെ ബലി നല്‍കിയാലും പാര്‍ട്ടി അതില്‍ നിന്ന് പിന്നോക്കം പോകില്ല. അക്രമത്തിലൂടെ പ്രവര്‍ത്തകരെ ഭയപ്പെടുത്താന്‍ നോക്കേണ്ട. ഇതിനെല്ലാം ജനാധിപത്യ-ഭരണഘടനാനുസൃതമായി മറുപടി നല്‍കാന്‍ പാര്‍ട്ടി പ്രതിജ്ഞാബദ്ധമാണെന്നും അദ്ദേഹം ഓര്‍മിപ്പിച്ചു.
 അടുത്തതവണ കേരളം ഭരിക്കുന്നത് ബി.ജെ.പിയായിരിക്കും. കഴിഞ്ഞ തെരഞ്ഞെടുപ്പില്‍ ബി.ജെ.പിക്ക് 15 ശതമാനം വോട്ട് നല്‍കി ശക്തമായ പിന്തുണയാണ് ജനം നല്‍കിയത്. കൂടാതെ നിയമസഭയില്‍ താമര വിരിയിക്കാനായെന്നും അമിത് ഷാ പറഞ്ഞു.
 അടുത്ത തെരഞ്ഞെടുപ്പില്‍ കേരളത്തില്‍ ബി.ജെ.പി അധികാരത്തിലെത്തുമെന്ന് പാര്‍ട്ടിയുടെ മുന്‍ ദേശീയ പ്രസിഡന്റും കേന്ദ്ര നഗരകാര്യ മന്ത്രിയുമായ വെങ്കയ്യ നായിഡു പറഞ്ഞു.
കൊലപാതകരാഷ്ട്രീയം കൊണ്ട് കമ്മ്യൂണിസ്റ്റുകള്‍ക്ക് ബി.ജെ.പിയെ തടുക്കാനാവില്ല. കമ്മ്യൂണിസ്റ്റ് പാര്‍ട്ടികള്‍ രാജ്യത്ത് ഇന്ന് എവിടെയാണുള്ളത്. പാര്‍ലമെന്റിലെ അവരുടെ സ്ഥിതി എന്താണ്, അതിനേക്കാള്‍ ദയനീയ സ്ഥിതിയാണ് ഇനി അവര്‍ അഭിമുഖീകരിക്കാനിരിക്കുന്നതെന്നും അദ്ദേഹം പറഞ്ഞു.