കൊണ്ടോട്ടി: ചീക്കോട് കുടിവെള്ള പദ്ധതി വിതരണ ലൈന്‍ സ്ഥാപിക്കലും, ഗാര്‍ഹിക കണക്ഷന്‍ നല്‍കാനുള്ള ചുമതലയും ജലനിധി ഏറ്റെടുത്തു. ജലനിധി ചുമതല ഏറ്റെടുക്കാന്‍ തീരുമാനിച്ചിരുന്നെങ്കിലും ഇത് സംബന്ധിച്ച് അനിശ്ചിതത്വം നിലനിന്നിരുന്നു. നേരത്തെ വാട്ടര്‍ അതോറിറ്റി നടപ്പാക്കാന്‍ തീരുമാനിച്ചിരുന്നെങ്കിലും ഗുണഭോക്താക്കള്‍ക്കിടയില്‍ നിന്ന് വന്ന വ്യാപക പരാതിയെ തുടന്ന് എം.എല്‍.എ ടി.വി ഇബ്രാഹീം മുന്‍ കൈയെടുത്ത് ജലനിധി ഉദ്യോഗസ്ഥരുമായി ചര്‍ച്ച നടത്തിയാണ് ഏറ്റെടുക്കാന്‍ തീരുമാനിച്ചത്.
ഇത് പ്രകാരം ഈ വര്‍ഷം തന്നെ പ്രവൃത്തി ആരംഭിക്കും. മുന്‍ ധാരണ പ്രകാരം തദ്ദേശ സ്ഥാപനങ്ങളുമായി സഹകരിച്ച് കൊണ്ടായിരിക്കും പദ്ധതി നടപ്പാക്കുക. ടി.വി ഇബ്രാഹീം എം.എല്‍.എ യുടെ അധ്യക്ഷതയില്‍ ഇതുമായി ബന്ധപ്പെട്ട് വൈദ്യര്‍ അക്കാദമിയില്‍ ഉദ്യോഗസ്ഥ ജനപ്രതിനിധികളുടെ യോഗം ചേര്‍ന്നു. വിവിധ പഞ്ചായത്ത് പ്രസിഡന്റ്, വൈസ് പ്രസിഡന്റ്, സെക്രട്ടറി, ബ്ലോക്ക് പ്രസിഡന്റ്, വൈസ് പ്രസിഡന്റ് , സെക്രട്ടറി മാരും ജലനിധി, വാട്ടര്‍ അതോററ്റി, പൊതുമരാമത്ത് വകുപ്പ് ഉദ്യോഗസ്ഥനമാരും പങ്കെടുത്തു.