കണ്ണൂര്‍: ഉപ്പാലവളപ്പ് തോട്ടിലെ മാലിന്യം വലിയൊരു ആരോഗ്യ പ്രശ്‌നമായി വളര്‍ന്നിരിക്കുകയാണെന്നും അതു നീക്കം ചെയ്യാന്‍ ഉടന്‍ നടപടികള്‍ സ്വീകരിക്കണമെന്നും മന്ത്രി കടന്നപ്പള്ളി രാമചന്ദ്രന്‍.
കലക്ടറേറ്റ് കോണ്‍ഫറന്‍സ് ഹാളില്‍ ജില്ലാ വികസന സമിതി യോഗത്തില്‍ സംസാരിക്കുകയായിരുന്നു അദ്ദേഹം. ജില്ലാ ആശുപത്രിയില്‍ നിന്നുള്ള മാലിന്യമാണ് തോട്ടില്‍ അടിഞ്ഞുകൂടിയിരിക്കുന്നതെന്നും ഇവിടുത്തെ മാലിന്യ പ്ലാന്റ് യാഥാര്‍ഥ്യമാവുന്നതോടെ പ്രശ്‌നത്തിന് പരിഹാരമാവുമെന്നും കോര്‍പറേഷന്‍ അധികൃതര്‍ യോഗത്തെ അറിയിച്ചു. നിലവിലുള്ള മാലിന്യം നീക്കം ചെയ്യുന്നതിനുള്ള എസ്റ്റിമേറ്റ് തയാറാക്കി മലിനീകരണ നിയന്ത്രണ ബോര്‍ഡിന്റെ അംഗീകാരത്തിനായി സമര്‍പ്പിക്കണമെന്ന് കോര്‍പറേഷന്‍ അധികൃതര്‍ക്ക് കലക്ടര്‍ മിര്‍ മുഹമ്മദലി നിര്‍ദേശം നല്‍കി.
കടന്നപ്പള്ളി പഞ്ചായത്തില്‍ കാട്ടു പോത്തിനെ കാണാനിടയായ സംഭവത്തില്‍ ജനങ്ങളുടെ ആശങ്കയകറ്റാന്‍ ബന്ധപ്പെട്ട ഉദ്യോഗസ്ഥര്‍ ആവശ്യമായ നടപടികള്‍ സ്വീകരിക്കണമെന്നും മന്ത്രി പറഞ്ഞു.
പിലാത്തറ-പാപ്പിനിശ്ശേരി റോഡില്‍ അപകടം പെരുകുന്ന പശ്ചാത്തലത്തില്‍ മുന്നറിയിപ്പ് ബോര്‍ഡുകള്‍ സ്ഥാപിക്കുകയും റോഡില്‍ വരയിടുകയും ചെയ്യണമെന്ന് നിരന്തരമായി ആവശ്യപ്പെട്ടിട്ടും ബന്ധപ്പെട്ടവരുടെ ഭാഗത്ത് നിന്ന് യാതൊരു നടപടിയും ഉണ്ടായില്ലെന്ന് ടി.വി രാജേഷ് എം.എല്‍.എ കുറ്റപ്പെടുത്തി.
പെരുമ്പ നദിയിലെ മാലിന്യം ഏതെങ്കിലും ക്ലീനിങ് ഏജന്‍സിയെ ഉപയോഗിച്ച് നീക്കുന്ന കാര്യത്തില്‍ നിര്‍ദേശങ്ങള്‍ സമര്‍പ്പിക്കാന്‍ കലക്ടര്‍ ബന്ധപ്പെട്ടവരോട് ആവശ്യപ്പെട്ടു.
യോഗത്തില്‍ എം.എല്‍.എമാരായ സി കൃഷ്ണന്‍, സണ്ണി ജോസഫ്, ജെയിംസ് മാത്യു, ജില്ലാ പ്ലാനിങ് ഓഫിസര്‍ കെ പ്രകാശന്‍ സംബന്ധിച്ചു.