റിയാദ്: സഊദിഅറേബ്യക്കു വന്‍ തോതില്‍ ആയുധം വില്‍ക്കുന്നതിന് അമേരിക്കന്‍ കരാറിന് സെനറ്റ് അംഗീകാരം നല്‍കി. ഏകദേശം 1.15 ബില്യണ്‍ ഡോളറിന്റെ ആയുധ ഇടപാടിനാണ് അമേരിക്കന്‍ സെനറ്റ് യോഗം കഴിഞ്ഞ ദിവസം അംഗീകാരം നല്‍കിയത്.

കഴിഞ്ഞ ആഗസ്റ്റില്‍ തന്നെ ആയുധ ഇടപാടിന് പെന്റഗണ്‍ അംഗീകാരം നല്‍കിയിരുന്നെങ്കിലും സെനറ്റിന്റെ അംഗീകാരത്തിനായി കാത്തു നില്‍ക്കുകയായിരുന്നു. ഇരുപത്തി ഏഴിനെതിരെ എഴുപത്തി ഒന്ന് വോട്ടു നേടിയാണ് സഊദിയുമായുള്ള ആയുധ കരാര്‍ അംഗീകരിച്ചത്.

രാജ്യത്തിന് വിവിധ മേഖലകളില്‍ നിന്നും ഭീഷണി നേരിടുന്ന സാഹചര്യത്തിലാണ് അമേരിക്കയില്‍ നിന്നും വന്‍ തോതില്‍ ആയുധങ്ങള്‍ വാങ്ങിക്കൂട്ടാന്‍ സഊദി അറേബ്യ ശ്രമം തുടങ്ങിയത്.

നൂറ്റി മുപ്പത്ത് അത്യാധുനിക യുദ്ധ ടാങ്കറുകളും ഇരുപതു കവചിത വാഹനങ്ങളും മറ്റ് അത്യാധുനിക ആയുധങ്ങളുമാണ് സഊദി അറേബ്യ അമേരിക്കയില്‍ നിന്നും ഇറക്കുമതി ചെയ്യുന്നത്. നിലവില സാഹചര്യത്തില്‍ ഇത് രാജ്യ സുരക്ഷക്ക് വിലിയ മുതല്‍ കൂട്ടാവുമെന്നാണ് സഊദി കണക്കുകൂട്ടല്‍. ആയുധ കച്ചവടത്തിനായി ഏറെ നേരത്തെ ചര്‍ച്ചകള്‍ക്ക് ശേഷമാണ് വോട്ടെടുപ്പിന് സെനറ്റ് മുതിര്‍ന്നത്.

യമനിലടക്കം വിവിധ രാജ്യങ്ങളില്‍ സഊദിയുടെ ഇടപെടല്‍ സൂചിപ്പിച്ചതിനെ തുടര്‍ന്നാണ് ചര്‍ച്ചകള്‍ ഏറെ നേരം നീണ്ടു പോയതെന്ന് വിദേശ മാധ്യമങ്ങള്‍ റിപ്പോര്‍ട്ട് ചെയ്തു . റിപ്പബ്ലിക്കന്‍ സെനറ്റര്‍ നാന്‍ഡ് പോള്‍, ഡെമോക്രാറ്റിക് സെനറ്റര്‍ ക്രിസ് മുര്‍ഫി എന്നിവരാണ് യമനിലെ സഊദി ഇടപെടല്‍ വിഷയം ഉന്നയിച്ചത്.

മാത്രമല്ല നിലവിലെ സാഹചര്യത്തില്‍ മേഖലയില്‍ കൂടുതല്‍ പ്രശ്‌നങ്ങള്‍ക്ക് ഇപ്പോഴത്തെ ആയുധ കൈമാറ്റം കാരണമാകുമെന്നും ഇവര്‍ ആരോപിച്ചു. എന്നാല്‍ ചര്‍ച്ചകള്‍ക്ക് ശേഷം നടന്ന വോട്ടെടുപ്പിലൂടെ ആയുധ കൈമാറ്റത്തിന് സെനറ്റ് അംഗീകാരം നല്‍കുകയായിരുന്നു. പുതിയ കരാറിലൂടെ അമേരിക്കയുമായുള്ള സഊദിയുടെ ബന്ധം കൂടുതല്‍ ശക്തിപ്പെടുമെന്നാണ് വിദഗ്ദ്ധരുടെ നിഗമനം. നിലവില്‍ മേഖലയിലെ ഏറ്റവും വലിയ സൈനിക ശക്തിയായി സഊദി മാറിക്കഴിഞ്ഞിട്ടുണ്ട്.