കാസര്‍കോട്: കാടുകൊണ്ടു മൂടിക്കിടക്കുന്ന സിവില്‍ സ്റ്റേഷന്‍ പരിസരം വൃത്തിയാക്കി.
ചെങ്കള പഞ്ചായത്ത് സഹകരണത്തോടെ എടനീര്‍ സ്വാമിജീസ് ഹയര്‍ സെക്കന്‍ഡറി സ്‌കൂളിലെ നാഷനല്‍ സര്‍വിസ് സ്‌കീം വിദ്യാര്‍ഥികളും ചെങ്കള പഞ്ചായത്തിലെ കുടുംബശ്രീ പ്രവര്‍ത്തകരുമാണ് സിവില്‍ സ്റ്റേഷന്‍ പരിസരത്ത് ശുചീകരണത്തില്‍ പങ്കുചേര്‍ന്നത്.
ഒരാള്‍ പൊക്കത്തില്‍ വളര്‍ന്ന വള്ളികളും കാടുകളും കൊണ്ട് മൂടിയതിനാല്‍ ഇഴജന്തുക്കളുടെ താവളമായിരിക്കുകയാണ് കലക്ടറേറ്റും പരിസരവും.
50 പേരടങ്ങുന്ന വിദ്യാര്‍ഥികളുടെ എന്‍.എസ്.എസ് സംഘമാണ് വൃത്തിയാക്കാനുള്ള സാമഗ്രികളുമായി എടനീരില്‍ നിന്നും കലക്ടറേറ്റിലെത്തി കുടുംബശ്രീ പ്രവര്‍ത്തകര്‍ക്കൊപ്പം കൈകോര്‍ത്തത്.
ഈ വിദ്യാര്‍ഥി -കുടുംബശ്രീ കൂട്ടായ്മ കലക്ടര്‍ കെ. ജീവന്‍ ബാബു ഉദ്ഘാടനം ചെയ്തു. കുടുംബശ്രീ ജില്ലാ മിഷന്‍ കോഡിനേറ്റര്‍ അബ്ദുള്‍ മജീദ് ചെമ്പരിക്ക, ചെങ്കള പഞ്ചായത്ത് വൈസ് പ്രസിഡന്റ് ഇ ശാന്തകുമാരി, വാര്‍ഡ് മെമ്പര്‍മാരായ എന്‍.എ മുഹമ്മദ് താഹിര്‍, സഫിയ തുടങ്ങിയവര്‍ പങ്കെടുത്തു.