ശാസ്താംകോട്ട: വിവാഹസദ്യ ഒരുക്കുന്ന ഓഡിറ്റോറിയത്തിലേക്ക് സാധനങ്ങളുമായി ഓട്ടോയില്‍ പോകുകയായിരുന്ന അംഗപരിമിതനെ ശുരനാട് എസ്.ഐ മര്‍ദിച്ചതായി പരാതി.
ശൂരനാട് തെക്ക് ത്യക്കുന്നപ്പുഴ പുലിത്തിട്ട വടക്കതില്‍ ദിലീപിനെയാണ് കഴിഞ്ഞ ദിവസം രാത്രി പതാരത്തിന് സമീപം എസ്.ഐ മര്‍ദ്ദിച്ചത്.
ദിലീപും സുഹ്യത്തുക്കളും സഞ്ചരിച്ച ഓട്ടോ തടഞ്ഞു നിര്‍ത്തി ദിലീപിന്റെ ഇരു ചെകിടത്തും അടിക്കുകയും സുഹ്യത്തുക്കളായ വിജിത്ത്, സുനില്‍ എന്നിവരെ ചൂരല്‍ കൊണ്ട് അടിയ്ക്കുകയുമായിരുന്നു. ചെവിയില്‍ നിന്ന് രക്തം വരികയും കേള്‍വി നഷ്ടപ്പെടുകയും ചെയ്ത ദിലീപ് ശാസ്താംകോട്ട താലൂക്ക് ആശുപത്രിയില്‍ ചികിത്സയിലാണ്. വിദഗ്ധ ചികത്സയ്ക്കായി ദിലീപിനെ ഇന്ന് ജില്ലാ ആശുപത്രിയിലേക്ക് മാറ്റും. എസ്.ഐക്കെതിരെ നടപടി സ്വീകരിക്കണമെന്ന് ആവശ്യപ്പെട്ട് കൊട്ടാരക്കര ഡി.വൈ.എസ്.പിയ്ക്ക് പരാതി നല്‍കിയിട്ടുണ്ട്.