കല്‍പ്പറ്റ: ഇന്ത്യന്‍ വ്യോമസേനയിലെ ജോലിസാധ്യതകളെകുറിച്ച് യുവാക്കള്‍ക്കിടയില്‍ പ്രചരാണം വര്‍ധിപ്പിക്കുന്നതിന്റെ ഭാഗമായി ജില്ലയില്‍ കോളജുകള്‍ കേന്ദ്രീകരിച്ച് ബോധവല്‍ക്കരണ പ്രവര്‍ത്തനങ്ങള്‍ സംഘടിപ്പിക്കുമെന്ന് ആര്‍മി റിക്രൂട്ട്‌മെന്റ് വിഭാഗം അധികൃതര്‍ വാര്‍ത്താസമ്മേളനത്തില്‍ അറിയിച്ചു. ഇന്ന് രാവിലെ പത്തിന് കല്‍പ്പറ്റ എന്‍.എം.എസ്.എം കോളജിലും പകല്‍ രണ്ടിന് മാനന്തവാടി ഗവ. കോളജിലും ബോധവല്‍ക്കരണ ക്ലാസുകള്‍ നടത്തും. ഈ കോളജുകളിലെ വിദ്യാര്‍ഥികള്‍ക്കു പുറമെ ജില്ലയിലെ മറ്റ് കോളജുകളിലെയും വിദ്യാര്‍ഥികള്‍ക്ക് പരിപാടിയില്‍ പങ്കെടുക്കാം. ഗ്രാമീണ മേഖലകളില്‍ വായുസേനയിലെ ജോലിസാധ്യതകളെ കുറിച്ച് കൂടുതല്‍ അവബോധം ഉണ്ടാക്കേണ്ടതുണ്ടെന്ന് വാര്‍ത്താസമ്മേളനത്തില്‍ പങ്കെടുത്ത ഇന്ത്യന്‍ എയര്‍ഫോഴ്‌സ് വിങ്കമാന്‍ഡര്‍ സി.ബി വര്‍ഗീസ് പറഞ്ഞു.
2017 ജനുവരി-ഫെബ്രുവരി മാസങ്ങളിലായി നടക്കുന്ന എയര്‍ഫോഴ്‌സില്‍ അഖിലേന്ത്യാ തലത്തില്‍ ടെക്‌നിക്കല്‍, നോണ്‍ടെക്‌നിക്കല്‍ വിഭാഗം എയര്‍മാന്‍മാരുടെ തെരഞ്ഞെടുപ്പിനായി 29 വരെ ഓണ്‍ലൈനായി അപേക്ഷിക്കാം. കൂടുതല്‍ വിവരങ്ങള്‍ക്ക് ംംം.മശൃാലിലെഹലരശേീി.ഴീ്.ശി എന്ന വെബ്‌സൈറ്റില്‍ ലഭ്യമാവും.
വായുസേനയില്‍ ഗരുഡ കമാന്‍ഡോസിനെ തെരഞ്ഞെടുക്കുന്നതിനായി കൊച്ചി കലൂര്‍ ഇന്റര്‍നാഷണല്‍ സ്‌റ്റേഡിയത്തില്‍ നവംബര്‍ 21 മുതല്‍ 24വരെ എയര്‍ഫോഴ്‌സ് റിക്രൂട്ട്‌മെന്റ് റാലി നടത്തും. ജില്ലയില്‍ നിന്നുള്ളവര്‍ക്ക് 23നാണ് റാലി. 17 വയസിനും 21 വയസിനും ഇടയിലുളളവര്‍ക്ക് പങ്കെടുക്കാം. എയര്‍ഫോഴ്‌സ് റിക്രൂട്ട്‌മെന്റ് വിഭാഗം ജൂനിയര്‍ വാറന്റ് ഓഫിസര്‍ എന്‍.കെ റോഹലും വാര്‍ത്താസമ്മേളത്തില്‍ പങ്കെടുത്തു. ഫോണ്‍: 0484- 2827010.