കോഴിക്കോട്: ബിജെപി ദേശീയ കൗണ്‍സിലില്‍ പങ്കെടുക്കാനെത്തിയ പ്രധാനമന്ത്രി നരേന്ദ്രമോദിക്ക് വ്യാജബോംബ് ഭീഷണി ഉണ്ടായതായി റിപ്പോര്‍ട്ട്. നടക്കാവ് പൊലീസ് സ്റ്റേഷനിലാണ് ഭീഷണി സന്ദേശമെത്തിയത്. ഗള്‍ഫില്‍ നിന്നും ഇന്റര്‍നെറ്റ് കോള്‍ മുഖേനെയാണ് ഭീഷണി സന്ദേശം എത്തിയതെന്ന് കണ്ടെത്തിയിട്ടുണ്ട്. സംഭാഷണം പൂര്‍ണമായും ഹിന്ദിയിലായിരുന്നു.

സംഭവത്തില്‍ പൊലിസ് കേസ് രജിസ്റ്റര്‍ ചെയ്തിട്ടുണ്ട്. 24ാംതിയതി പുലര്‍ച്ചെയാണ് ഭീഷണി സന്ദേശം എത്തിയത്. ഡിജിപിയുടെ കര്‍ശന നിര്‍ദേശത്തെ തുടര്‍ന്നായിരുന്നു വിവരം പുറത്തുവിടാതിരുന്നതെന്നാണ് അറിയുന്നത്. പൊലീസിനൊപ്പം കേന്ദ്ര രഹസ്യാന്വേഷണ ഏജന്‍സിയും അന്വേഷണം ആരംഭിച്ചിട്ടുണ്ട്.