പാലക്കാട്: സാംസ്‌കാരിക വകുപ്പ്, ജില്ലാ ഭരണകൂടം, ഇന്‍ഫര്‍മേഷന്‍ ആന്റ് പബ്ലിക്ക് റിലേഷന്‍സ് വകുപ്പ്, ലൈബ്രറി കൗണ്‍സില്‍, വിദ്യാഭ്യാസ വകുപ്പ്, വിവിധ സന്നദ്ധ സംഘടനകള്‍ , വിവിധ വകുപ്പുകള്‍ സംയുക്തമായി നടപ്പാക്കുന്ന ശ്രീനാരായണ ഗുരുവിന്റെ നമുക്ക് ജാതിയില്ല വിളംബരം ശതാബ്ദി ആഘോഷത്തിന്റെ പ്രചരണ പരിപാടികള്‍ ആസൂത്രണം ചെയ്യുന്നതിനുളള സംഘാടക സമിതി അവലോകനയോഗം ജില്ലാ കലക്റ്റര്‍ പി.മേരിക്കുട്ടിയുടെ അധ്യക്ഷതയില്‍ കളക്റ്ററുടെ ചേംബറില്‍ സെപ്റ്റംബര്‍ 30-ന് ഉച്ചക്ക് 12.30ന് ചേരും.
പ്രചരണപരിപാടിയുടെ ജില്ലാതല ഉദ്ഘാടനം ഒക്ടോബര്‍ എട്ടിന് താരേക്കാടുളള ഇ. പത്മനാഭന്‍ മന്ദിരം ഹാളില്‍(എന്‍.ജി.ഒ യൂണിയന്‍ ഹാള്‍) വൈകീട്ട് മൂന്നിന് മന്ത്രി എ.കെ ബാലന്‍ നിര്‍വഹിക്കും. ഷാഫി പറമ്പില്‍ എം.എല്‍.എ അദ്ധ്യക്ഷനാവും.
വിഷയം ആസ്പദമാക്കി പ്രഭാഷണങ്ങളും സംവാദവും ടക്കും. തുടര്‍ന്ന് കലാമണ്ഡലം വിദ്യാര്‍ത്ഥികള്‍ അവതരിപ്പിക്കുന്ന വിവിധ കലാപരിപാടികളും കവിതാപാരായണവും നടക്കും. പ്രചരണ പരിപാടിയുടെ ഭാഗമായി സ്‌കൂള്‍ വിദ്യാര്‍ത്ഥികള്‍ക്കായി ക്വിസ്, ഉപന്യാസ രചന, ചിത്രരചന മത്സരങ്ങളും സംഘടിപ്പിക്കും.
ജില്ല കലക്ടര്‍ പി.മേരിക്കുട്ടിയാണ് സംഘാടക സമിതി ചെയര്‍പേഴ്‌സന്‍. സംസ്ഥാന ലൈബ്രറി കൗണ്‍സില്‍ എക്‌സിക്യൂട്ടിവ് അംഗം പി.കെ സുധാകരന്‍ കണ്‍വീനറാണ്.
ജില്ല പഞ്ചായത്ത് വൈസ് പ്രസിഡന്റ് ടി.കെ നാരായണദാസ്, എ.ഡി.എം എസ് വിജയന്‍, ജില്ല പൊലിസ് മേധാവി എസ്.ശ്രീനിവാസ്, ആര്‍.ഡി.ഒമാരായ പി.ബി നൂഹ്, എ. ഉണ്ണികൃഷ്ണന്‍, ചലച്ചിത്ര നിരൂപകന്‍ ജി.പി രാമചന്ദ്രന്‍ തുടങ്ങിയവര്‍ വൈസ് ചെയര്‍മാന്‍മാരും ജില്ല പബ്ലിക് ലൈബ്രറി സെക്രട്ടറി ടി.ആര്‍ അജയന്‍, പി.ആര്‍.ഡി മേഖല ഡെപ്യൂട്ടി ഡയറക്ടര്‍ എം.എസ് അലികുഞ്ഞ്, പു.ക.സ സെക്രട്ടറി എ.കെ ചന്ദ്രന്‍ കുട്ടി തുടങ്ങിയവര്‍ ജോയിന്റ് കണ്‍വീനര്‍മാരായിരിക്കും.