പാലക്കാട്: ഒക്‌ടോബര്‍ 15ന് നടക്കുന്ന സംസ്ഥാന ചലച്ചിത്ര പുരസ്‌കാര വിതരണത്തോടനുബന്ധിച്ച് കേരള നവോത്ഥാനവും സാംസ്‌കാരിക ചരിത്രവും വിഷയമാക്കി പ്രദര്‍ശനം സംഘടിപ്പിക്കും.
ആര്‍ക്കിയോളജി വകുപ്പിന്റെ സഹകരണത്തോടെ കേരള ചലച്ചിത്ര അക്കാദമിയാണ് ഒക്‌ടോബര്‍ 12,13,14 തിയ്യതികളില്‍ പാലക്കാട് ഇന്ദിരാഗാന്ധി മുനിസിപ്പല്‍ സ്റ്റേഡിയത്തില്‍ പ്രദര്‍ശനം സംഘടിപ്പിക്കുന്നത്.
നിയമ സാംസ്‌കാരിക പിന്നോക്കക്ഷേമ വകുപ്പ് മന്ത്രി എ.കെ.ബാലന്റെ അധ്യക്ഷതയില്‍ ചേര്‍ന്ന സാംസ്‌കാരിക ഉപസമിതി യോഗത്തിലാണ് തീരുമാനം.
പ്രദര്‍ശന ദിവസങ്ങളില്‍ പ്രത്യേകം സജ്ജമാക്കിയ വേദിയില്‍ കലാപരിപാടികളും അരങ്ങേറും. കേരള സംഗീത നാടക അക്കാദമിയും, കേരള ഫോക്‌ലോര്‍ അക്കാദമിയും, കേരള കലാമണ്ഡലവും സംയുക്തമായാണ് കലാപരിപാടികള്‍ അവതരിപ്പിക്കുക.
ചിത്രപ്രദര്‍ശനത്തോടനുബന്ധിച്ച് നടക്കുന്ന പ്രത്യേക കലാപരിപാടികളുടെ ഉദ്ഘാടനം ഒക്‌ടോബര്‍ 12-ന് വൈകീട്ട് അഞ്ച് മണിക്ക് നടക്കും. പ്രവേശനം സൗജന്യമായിരിക്കും.
പ്രദര്‍ശനത്തിന്റെ ഭാഗമായി ചിത്രകാരന്‍മാരുടെയും ശില്‍പികളുടെയും കൂട്ടായ്മയും ഒക്‌ടോബര്‍ 12-ന് നടക്കും. വൈകീട്ട് മൂന്ന് മണിക്ക് പ്രദര്‍ശന വേദിയിലാണ് കൂട്ടായ്മ നടക്കുക.
കൂട്ടായ്മയില്‍ നവോത്ഥാന, സാംസ്‌കാരിക ചരിത്രവുമായി ബന്ധപ്പെട്ട വിഷയങ്ങളില്‍ ചിത്രകാരന്‍മാര്‍ തങ്ങളുടെ സൃഷ്ടികള്‍ വലിയ ക്യാന്‍വാസില്‍ പകര്‍ത്തും. പങ്കെടുക്കാന്‍ ആഗ്രഹിക്കുന്ന കലാകാരന്‍മാര്‍ ആര്‍ട്ടിസ്റ്റ് ബൈജുദേവുമായി ബന്ധപ്പെടേണ്ടതാണ്. ഫോണ്‍ : 9656602090.