കണ്ണൂര്‍: സ്വാശ്രയ കോളജുകള്‍ വഴി സര്‍ക്കാര്‍ വിദ്യാഭ്യാസ കച്ചവടം നടത്തുന്നതിനിടെ കേരളം ദര്‍ശിച്ച ഏറ്റവും രക്തരൂക്ഷിത സമരങ്ങളിലൊന്നായിരുന്നു കൂത്തുപറമ്പ് സമരം. പരിയാരം മെഡിക്കല്‍ കോളജിന്റെ മറവില്‍ മെഡിക്കല്‍ വിദ്യാര്‍ഥികളില്‍ നിന്നു കോഴവാങ്ങി നിയമനം നടത്തുന്നതിനെതിരേ ആദ്യം സമരത്തിനിറങ്ങിയത് എസ്.എഫ്.ഐയാണെങ്കിലും പിന്നീട് ഡി.വൈ.എഫ്.ഐ ഏറ്റെടുക്കുകയായിരുന്നു. സി.പി.എമ്മിന്റെ കണ്ണിലെ കരടായ എം.വി രാഘവന്‍ സഹകരണമന്ത്രിയും പരിയാരം മെഡിക്കല്‍ കോളജിന്റെ സാരഥിയുമായത് സമരത്തിന് എരിവേറ്റി. കൂത്തുപറമ്പ് അര്‍ബന്‍ ബാങ്ക് ഉദ്ഘാടനത്തിനെത്തിയ എം.വി രാഘവനെ തടയാനെത്തിയ ഡി.വൈ.എഫ്.ഐ പ്രവര്‍ത്തകര്‍ക്കെതിരെ പൊലിസ് അകാരണമായി നിറയൊഴിച്ചപ്പോള്‍ പൊലിഞ്ഞത് അഞ്ച് ജീവനായിരുന്നു.
അതേ തുടര്‍ന്ന് കേരളമാകെ കത്തി. എം.വി ആറിന്റെ വീടും സ്‌നേക്ക്പാര്‍ക്കും കത്തിച്ചു. ആയിരക്കണക്കിന് സര്‍ക്കാര്‍ വാഹനങ്ങള്‍ നശിപ്പിച്ചു. ഒടുവില്‍ കെ കരുണാകരന്‍ നേതൃത്വം നല്‍കിയ മന്ത്രിസഭതന്നെ അടുത്ത തെരഞ്ഞെടുപ്പില്‍ കൂത്തുപറമ്പിലെ യുവാക്കളൊഴുക്കിയ ചോരയില്‍ ഒലിച്ചുപോയി. ഡി.വൈ.എഫ്.ഐയുടെ സംസ്ഥാനനേതൃത്വം അന്ന് എം.വി ജയരാജന്റെ കരങ്ങളിലായിരുന്നു. തീപ്പൊരി പ്രസംഗവും ചടുലനീക്കവുമായി ജയരാജന്‍ നിറഞ്ഞുനിന്നു. തലനാരിഴയ്ക്കാണ് ഈ യുവജന നേതാവ് വെടിയുണ്ടയില്‍ നിന്നു രക്ഷപ്പെട്ടത്. ഡി.വൈ.എഫ്.ഐ ജില്ലാകമ്മിറ്റിയംഗം പാനൂരിലെ കെ രാജീവന് വെടികൊള്ളുമ്പോള്‍ തൊട്ടടുത്തു ജയരാജനുണ്ടായിരുന്നു. പൊലിസ് തല്ലിചതച്ചു അവശനാക്കിയ ജയരാജനെ വാഹനത്തിലിട്ടും മര്‍ദ്ദിച്ചു. ക്രൂര മര്‍ദനത്തിനിരയായ ജയരാജന്‍ പിന്നീട് ജയിലിലുമായി. എല്‍.ഡി.എഫ് സര്‍ക്കാര്‍ വന്നപ്പോള്‍ എം.വി ആറില്‍ നിന്നു സി.പി.എം പരിയാരം പിടിച്ചെടുത്തു. കൂത്തുപറമ്പില്‍ സമരം നയിച്ച എം.വി ജയരാജന്‍ തന്നെ ഒടുവില്‍ ചെയര്‍മാനുമായി. യു.ഡി.എഫ് ഇപ്പോള്‍ സ്വാശ്രയപ്രശ്‌നം പിണറായി സര്‍ക്കാരിനെതിരേ ആഞ്ഞടിക്കാനുള്ള വടിയായി ഉപയോഗിക്കുന്നത് പരിയാരം മെഡിക്കല്‍ കോളജില്‍ മെഡിക്കല്‍ സീറ്റില്‍ തലവരിപ്പണം വാങ്ങുന്നത് ചൂണ്ടിക്കാട്ടിയാണ്. വിദ്യാഭ്യാസ കച്ചവടത്തിനെതിരേ സമരം ചെയ്ത സി.പി.എം പരിയാരത്തു നടത്തുന്നതും വിദ്യാഭ്യാസ കച്ചവടമാണെന്ന് ആരോപിച്ച് എസ്..എഫ്..ഐ, ഡി.വൈ.എഫ്.ഐ സംഘടനകളെ നിര്‍വീര്യമാക്കുകയാണ്. ഈ പശ്ചാത്തലത്തില്‍ കൂത്തുപറമ്പ് സമരനായകന്റെ രാജിക്ക് ഏറെ രാഷ്ട്രീയ പ്രാധാന്യമുണ്ട്.