മലപ്പറം: സ്‌കൂള്‍ പ്രവൃത്തി സമയങ്ങളില്‍ ഇരുചക്രവാഹനങ്ങളില്‍ സ്‌കൂളുകള്‍ക്കു മുന്നില്‍ വിലസുന്ന പൂവാലന്‍മാര്‍ക്കെതിരെ പൊലിസ് ശക്തമായ നടപടി തുടങ്ങി. ഇന്നലെ മലപ്പുറം എം.എസ്.പി. ഹയര്‍സെക്കന്‍ഡറി സ്‌കൂളിനു മുന്നില്‍ അപകടകരമായ വിധത്തിലും അമിത വേഗതയിലും വാഹനമോടിച്ചു വിലസിയ പൂവാലന്‍മാരുടെ വാഹനങ്ങള്‍ മലപ്പുറം ഡി.വൈ.എസ്.പിയുടെ നേതൃത്വത്തില്‍ പിടിച്ചെടുത്തു. അതേ സമയം പിടിച്ചെടുത്ത വാഹനങ്ങളില്‍ ഒരു ബുള്ളറ്റ് കഴിഞ്ഞയാഴ്ച മലപ്പുറത്തുനിന്നും മോഷണം പോയതാണെന്നു അന്വേഷണത്തില്‍ കണ്ടെത്തി. മലപ്പുറം ഡിവൈ.എസ്.പി പി.എം. പ്രദീപിന്റെ നേതൃത്വത്തിലുള്ള സംഘമാണ് വാഹനങ്ങള്‍ പിടികൂടി നിയമ നടപടി സ്വീകരിച്ചത്. പൊലിസ് ഇന്‍പെക്ടര്‍ പ്രേംജിത്ത്, സിവില്‍ പൊലിസ് ഓഫീസര്‍മാരായ മുസ്തഫ, അബ്ദുല്‍ ലത്തീഫ്, സജിത്ത്, അനൂഷ് എന്നിവരും സംഘത്തിലുണ്ടായിരുന്നു. ഇത്തരത്തില്‍ ശല്യക്കാര്‍ക്കെതിരെ വരും ദിവസങ്ങളിലും ശക്തമായ നടപടി സ്വീകരിക്കുമെന്ന് ഡിവൈ.എസ്.പി പി.എം പ്രദീപ് പറഞ്ഞു.