കണ്ണൂര്‍: പൊതുസ്വത്തായ റെയില്‍വേ കൊള്ളയടിക്കാനുള്ള മേഖലയാക്കി കേന്ദ്രസര്‍ക്കാര്‍ മാറ്റിയെന്നു കെ.കെ രാഗേഷ് എം.പി. ട്രെയിന്‍ യാത്രക്കാരുടെ സുരക്ഷ ഉറപ്പാക്കുക, അമിത യാത്രാനിരക്ക് ഈടാക്കാനുള്ള നീക്കം ഉപേക്ഷിക്കുക തുടങ്ങിയ ആവശ്യങ്ങള്‍ ഉന്നയിച്ച് എന്‍.ജി.ഒ യൂനിയന്‍ ജില്ലാകമ്മിറ്റി കണ്ണൂര്‍ റെയില്‍വേ സ്റ്റേഷന്‍ പരിസരത്ത് സംഘടിപ്പിച്ച സായാഹ്ന ധര്‍ണ ഉദ്ഘാടനം ചെയ്യുകയായിരുന്നു അദ്ദേഹം. സ്‌പെഷല്‍ ട്രെയിനുകളിലടക്കം നിരക്ക് തോന്നിയതു പോലെ വര്‍ധിപ്പിക്കുന്നതും സ്ലീപ്പര്‍ ടിക്കറ്റുകാര്‍ക്കു മിനിമം യാത്രാദൂരം 220 കിലോമീറ്റര്‍ ആക്കിയതും ഇതിന്റെ ഭാഗമാണ്. എല്ലാ നിലയ്ക്കും യാത്രക്കാരില്‍ നിന്നു കൊള്ള നടത്തുന്നുണ്ടെങ്കിലും സുരക്ഷാ മാര്‍ഗങ്ങളോ മറ്റു സംവിധാനങ്ങളോ ഒരുക്കാന്‍ അധികൃതര്‍ തയാറാവുന്നില്ല. രാജ്യത്തെ ബഹുഭൂരിപക്ഷം ജനങ്ങളുടെ യാത്രാമാര്‍ഗമായ റെയില്‍വേയേ ജനവിരുദ്ധ നയങ്ങളിലൂടെ തകര്‍ച്ചയിലേക്കു തള്ളിവിടുകയാണു കേന്ദ്രസര്‍ക്കാരെന്നും കെ.കെ രാഗേഷ് കുറ്റപ്പെടുത്തി.
ജില്ലാ പ്രസിഡന്റ് ഗിരിജ കല്യാടന്‍ അധ്യക്ഷയായി. സംസ്ഥാന വൈസ് പ്രസിഡന്റ് സുജാത കടയ്ക്കല്‍ ജില്ലാ സെക്രട്ടറി എം.വി രവീന്ദ്രന്‍, സംസാരിച്ചു.