കൊച്ചി: രക്തം സ്വീകരിക്കുന്നതുവഴി ഇന്ത്യയിലാകെ 2,234 പേര്‍ക്ക് എച്ച്. ഐ.വി ബാധിച്ചിട്ടുണ്ടെന്നും ഇതില്‍ 29 എണ്ണം കേരളത്തിലാണെന്നും കണക്കുകള്‍ വ്യക്തമാക്കുന്നു.   രക്തദാനം വഴി രോഗം പടരുന്ന സാഹചര്യം വര്‍ധിക്കുന്നതിനാല്‍  സുരക്ഷിതമായ രക്തം ലഭ്യമാക്കേണ്ടതിന്റെ ആവശ്യകത വര്‍ധിച്ചുവരുകയാണെന്ന് ഐ.എം.എ രക്തബാങ്ക് ചെയര്‍മാന്‍ ഡോ. നാരായണന്‍ കുട്ടി പറഞ്ഞു. ദേശീയ എച്ച്. ഐ.വി നിയന്ത്രണ സംഘടന (നാകോ) യുടെ റിപ്പോര്‍ട്ടിന്റെ അടിസ്ഥാനത്തിലാണ് ഈ കണക്ക്.  രക്തദാനദിനത്തോട് അനുബന്ധിച്ചുള്ള ബോധവല്‍ക്കരണപരിപാടികളെക്കുറിച്ച് വാര്‍ത്താസമ്മേളത്തില്‍ സംസാരിക്കുയായിരുന്നു അദ്ദേഹം.
സ്വമേധയാ രക്തം ദാനം ചെയ്യേണ്ടതിന്റെ ആവശ്യകതയെക്കുറിച്ചും സുരക്ഷിതമായ രക്തം ലഭ്യമാക്കുന്നതിനു സഹായകമായ രീതിയില്‍ കേരളത്തിലുടനീളമുള്ള രക്തബാങ്കുകളില്‍ അത്യാധുനിക രക്ത പരിശോധനാ സംവിധാനങ്ങള്‍ ഏര്‍പ്പെടുത്തേണ്ടതിന്റെ ആവശ്യകതയും ചര്‍ച്ചചെയ്യണം.  2015-16 ല്‍ രക്തദാന ക്യാംപുകള്‍ ഉള്‍പ്പെടെയുള്ള വിവിധ സ്രോതസുകളിലൂടെ ശേഖരിച്ചത് 1.1 കോടി യൂണിറ്റ് രക്തമാണ്. 11.5 ലക്ഷം യൂണിറ്റിന്റെ കുറവാണിവിടെ രേഖപ്പെടുത്തിയിരിക്കുന്നതെന്ന് ആരോഗ്യ കുടുംബ ക്ഷേമ മന്ത്രാലയം പുറത്തു വിട്ട കണക്കുകള്‍ സൂചിപ്പിക്കുന്നു.
രോഗിക്ക് രക്തം നല്‍കുന്നത് ഏറെ പ്രധാനപ്പെട്ട ഒന്നാണ്. ഇതിനിടയിലുണ്ടാകുന്ന സങ്കീര്‍ണതകള്‍ എച്ച്.ഐ.വി, ഹൈപ്പറ്റിറ്റിസ്, ബി.ആന്റ് സി. തുടങ്ങിയവ പകരുന്നതിലേക്കു നയിച്ചേക്കാം. ന്യൂക്ലിയിക് ആസിഡ് ആംപ്ലിഫിക്കേഷന്‍ സാങ്കേതികവിദ്യ ഉപയോഗിച്ച് രക്ത യൂണിറ്റുകള്‍ പരിശോധിക്കുകയും ഇത്തരം അപകടം കുറക്കുകയും ചെയ്യാനാവും. കൊച്ചി ഐ.എം.എ രക്തബാങ്കില്‍ പ്രതിവര്‍ഷം ഏകദേശം 14,000 രക്തദാനങ്ങള്‍ നടക്കുന്നുണ്ടെന്നും ഇവയെല്ലാം തന്നെ സ്വമേധയാ ഉള്ളവയാണെന്നും രക്തബാങ്ക് സെക്രട്ടറി ഡോ. സുനില്‍ മത്തായി ചൂണ്ടിക്കാട്ടി. രക്തം സ്വീകരിക്കേണ്ട ആവശ്യം വരുന്നവര്‍ക്ക് സുരക്ഷിതത്വം ഉറപ്പാക്കുവാനാണ് തങ്ങള്‍ ശ്രമിക്കുന്നതെന്നും ഇക്കാര്യത്തില്‍ ബോധവല്‍ക്കരണപ്രവര്‍ത്തനങ്ങള്‍ നടത്തുമെന്നും ഇരുവരും  പറഞ്ഞു.