പൂനെ: ഐ.എസ്.എല്‍ മൂന്നാം സീസണിലെ ആദ്യ നാട്ടങ്കം ഇന്നു നടക്കും. മഹാരാഷ്ട്രയില്‍ നിന്നുള്ള രണ്ടു ടീമുകളായ പൂനെ സിറ്റി എഫ്.സി സ്വന്തം തട്ടകത്തില്‍ മുംബൈ സിറ്റി എഫ്.സിയെ നേരിടും. കഴിഞ്ഞ സീസണിലും ആദ്യ മത്സരത്തില്‍ നേര്‍ക്കുനേര്‍ വന്നപ്പോള്‍ മുംബൈ പൂനെയോടു പരാജയമേറ്റു വാങ്ങിയിരുന്നു. അതിന്റെ കണക്കു തീര്‍ക്കുകയാവും മുംബൈ ലക്ഷ്യമിടുന്നത്. ഐ.എസ്.എല്ലിന്റെ ഉദ്ഘാടന പതിപ്പിലും ആദ്യ മത്സരത്തിനിറങ്ങിയ മുംബൈ തോല്‍വിയോടെയാണ് തുടങ്ങിയത്. അങ്ങനെയൊരു പേരുദോഷമുള്ളതും മാറ്റാനുള്ള ഒരുക്കത്തിലാണ് അവര്‍.
ഉറുഗ്വെ ഇതിഹാസം ഡീഗോ ഫോര്‍ലാന്‍ മാര്‍ക്വീ താരമായി എത്തുന്ന മുംബൈ കടലാസില്‍ പുലികളാണ്. ഇതുവരെ നാലു തവണ നേര്‍ക്കുനേര്‍ വന്നപ്പോള്‍ രണ്ടു വിജയങ്ങളുമായി പൂനെ മുന്നില്‍ നില്‍ക്കുന്നു. മുംബൈ ഒരു ജയമാണ് നേടിയത്. ഒരു മത്സരം ഗോള്‍രഹിത സമനിലയില്‍.
ഡീഗോ ഫോര്‍ലാന്‍, സോണി നോര്‍ദെ, ജെര്‍സന്‍ വിയേര എന്നിവരാണ് മുംബൈയുടെ ശ്രദ്ധേയ താരങ്ങള്‍. എഡ്വാര്‍ഡോ പെരേര, അരാത്ത ഇസുമി, പിറ്റു എന്നിവരാണ് പൂനെ നിരയിലെ പ്രമുഖര്‍. ആദ്യ സീസണില്‍ കൊല്‍ക്കത്തയുടേയും രണ്ടാം സീസണില്‍ ചെന്നൈയിന്‍ നിരയുടേയും വല കാത്ത എഡല്‍ ബെറ്റെ എന്ന ഗോള്‍ കീപ്പര്‍ മൂന്നാം സീസണില്‍ പൂനെ നിരയിലുണ്ട്.
എഡല്‍ വല കാത്ത രണ്ടു ടീമുകളുമാണ് നേരത്തെ ചാംപ്യന്‍ പട്ടം നേടിയതെന്ന പ്രത്യേകതയുണ്ട്. വലയ്ക്കു മുന്നില്‍ എഡലിന്റെ സാന്നിധ്യം തന്നെ പൂനെയ്ക്ക് പ്ലസ് പോയിന്റാണ്. ഒപ്പം സ്വന്തം നാട്ടില്‍ കളിക്കുന്നതിന്റെ ആനുകൂല്യവും. രണ്ടു സീസണുകളിലും മികച്ച താര നിരയുണ്ടായിട്ടും കാര്യമായ ചലനങ്ങള്‍ സൃഷ്ടിക്കാന്‍ കഴിയാത്ത മുംബൈ ആ കുറവു മാറ്റി നാട്ടങ്കത്തില്‍ വിജയിച്ച് ഐ.എസ്.എല്ലിനു വിജയത്തുടക്കമിടുകയെന്ന ലക്ഷ്യമാണ് മുന്നില്‍ കാണുന്നത്.