കൂത്തുപറമ്പ്: ചിറ്റാരിപറമ്പ് ചെള്ളത്ത് വയലില്‍ വീടിന്റെ വാതില്‍ തകര്‍ത്ത് കവര്‍ച്ച. 30 പവന്‍ സ്വര്‍ണവും മൂവായിരം രൂപയും മോഷണം പോയി.
ചെള്ളത്ത് വയല്‍ എല്‍.പി.സ്‌കൂളിനടുത്തെ എ.ടി ഷാഹിദയുടെ വീട്ടിലാണ്  മോഷണം നടന്നത്. കിടപ്പുമുറിയിലെ മേശയില്‍ സൂക്ഷിച്ച സ്വര്‍ണാഭരണങ്ങളും രൂപയും എ.ടി.എം കാര്‍ഡ്, പാസ്‌പോര്‍ട്ട് എന്നിവയുമാണ് മോഷണം പോയത്.
ഇന്നലെ രാവിലെ 10 ഓടെ വീടു പൂട്ടി പുറത്തുപോയ വീട്ടുകാര്‍ വൈകുന്നേരം 5.30നു മടങ്ങിയെത്തിയപ്പോഴാണ് കുളിമുറിയുടെ വാതിലുകള്‍ തകര്‍ക്കപെട്ടതായി കണ്ടത്.
ഇതിലൂടെ അകത്തു കടന്ന മോഷ്ടാവ് അരക്കല്ലിന്റെ അടിയില്‍ സൂക്ഷിച്ച താക്കോല്‍ എടുത്ത് മറ്റു മുറികള്‍ തുറക്കുകയായിരുന്നു. വീട്ടുകാരുടെ പരാതിയില്‍ കണ്ണവം പൊലിസ് കേസെടുത്ത് അന്വേഷണം ആരംഭിച്ചു.