പറവൂര്‍: അടിക്കടി റേഷന്‍ വിഹിതം വെട്ടികുറയ്ക്കുന്ന കേന്ദ്രസര്‍ക്കാര്‍ നടപടി അവസാനിപ്പിക്കണമെന്നും, ഭക്ഷ്യസുരക്ഷ നടപ്പാക്കുമ്പോള്‍ നിലവിലുള്ള എല്ലാ കാര്‍ഡുകള്‍ക്കും റേഷന്‍ വിതരണം നിലനിര്‍ത്തുക, റേഷന്‍ വ്യാപാരികളെ ഇ.എസ്.ഐ പദ്ധതിയില്‍ ഉള്‍പ്പെടുത്തുക, റേഷന്‍വ്യാപാരികള്‍ക്കും സെയില്‍സ്മാന്‍മാര്‍ക്കും മിനിമം വേതനം ഉറപ്പാക്കുക,ഭക്ഷ്യസാധനങ്ങള്‍ റേഷന്‍ കടകളില്‍എത്തിക്കുന്നതിന് ഡോര്‍ഡെലിവറി നടപ്പാക്കുക,സാധനങ്ങളുടെ അളവില്‍ കുറവ് പരിഹരിക്കുക,എന്നീ ആവശ്യങ്ങള്‍ ഉന്നയിച്ച് കേരള സ്റ്റേറ്റ് റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ സംസ്ഥാനത്ത് കലക്റ്ററേറ്റ്,സപ്ലൈഓഫിസുകള്‍ കേന്ദ്രീകരിച്ചു നടത്താന്‍ പോകുന്ന സമരത്തിന്റെ ഭാഗമായി റേഷന്‍ വ്യാപാരികള്‍ പറവൂര്‍ താലൂക്ക് സപ്ലൈഓഫീസിന് മുന്നില്‍ കൂട്ടധര്‍ണ നടത്തി. ജനറല്‍ സെക്രട്ടറി കെ.പി വിശ്വനാഥന്‍ ഉദ്ഘാടനം ചെയ്തു.
ടി.സി സുരേഷ്ബാബുവിന്റെ അധ്യക്ഷതയില്‍ നടന്ന ധര്‍ണയില്‍ എം.വി.എം അയൂബ്, പി.എസ് വേണു, ടി.ജി ഉണ്ണി,അപ്പുനായര്‍, വി.എ യൂസഫ്, സുദര്‍ശനന്‍ എന്നിവര്‍ സംസാരിച്ചു.