കൊല്ലങ്കോട്: പുഴയില്‍ കളിച്ച് വസ്ത്രം മാറുന്നതിനിടെ യുവതിയുടെ കഴുത്തിലെ ഒന്നര പവന്‍ സ്വര്‍ണമാല പൊട്ടിച്ചോടിയ മോഷ്ടാവിനെ നാട്ടുകാര്‍ പിടികൂടി കൊല്ലങ്കോട് പൊലിസിനെ ഏല്‍പ്പിച്ചു.വടക്കഞ്ചേരി പ്രധാനി സ്വദേശി നസീര്‍ (30) യാണ് പിടിയിലായത്. ഇന്നലെ രാവിലെ എട്ടേമുക്കാലോടു കൂടിയാണ് സംഭവം. മലയാമ്പള്ളം കോഴികൊത്തി ശിവന്റെ ഭാര്യ രജിതയുടെ മാലയാണ് മോഷ്ടാവ് കൊണ്ടുപോയത്. ബഹളം വെച്ചതിനെ തുടര്‍ന്ന് നാട്ടുകാര്‍ കൂടിയപ്പോള്‍ മോഷ്ടാവിന്റെ രൂപസാദൃശ്യം പറഞ്ഞതിന്റെ അടിസ്ഥാനത്തില്‍ നടത്തിയ തിരിച്ചിലാണ് ഇയാളെ കണ്ടെത്തിയത്. കൊല്ലങ്കോട് പൊലിസിനെ വിവരം നല്‍കിയതിനെ തുടര്‍ന്ന് കുറ്റിപ്പാടത്ത് എത്തി മോഷ്ടാവിനെ കസ്റ്റഡിയിലെടുത്തു.വടക്കഞ്ചേരി, നെന്മാറ പൊലിസ് സ്റ്റേഷനുകളിലായി ഇയാള്‍ക്ക് ധാരാളം കേസുള്ളതായാണ് പ്രാഥമിക വിവരം.