താമരശ്ശേരി: കോഴിക്കോട് ടൗണില്‍ നിന്നും പരിസര പ്രദേശങ്ങളില്‍ നിന്നും ബൈക്ക് മോഷ്ടിച്ച് വില്‍പ്പന നടത്തുന്ന രണ്ടുപേരെ താമരശ്ശേരി പൊലിസ് പിടികൂടി. അരക്കിണര്‍ പടിക്കല്‍ വീട്ടില്‍ ഷാദില്‍ (18), കുണ്ടൂപറമ്പ് കണ്ണാംപറമ്പത്ത് മണികണ്ഠന്‍ (19) എന്നിവരെയാണ്് രഹസ്യവിവരത്തെ തുടര്‍ന്ന് എസ്.ഐ നൗഫലിന്റെ നേതൃത്വത്തില്‍ ഈങ്ങാപ്പുഴയില്‍ വച്ച് അറസ്റ്റ് ചെയ്തത്. ഇവരില്‍ നിന്നായി രണ്ടു ബൈക്കുകളും കസ്റ്റഡിയിലെടുത്തിട്ടുണ്ട്. ബീച്ച്, ഇഖ്‌റ ആശുപത്രി എന്നിവിടങ്ങളില്‍ നിന്നാണ് ബൈക്ക് മോഷ്ടിച്ചത്. ഇവര്‍ നേരത്തെയും മോഷ്ടിച്ച ബൈക്ക് അടിവാരം ഭാഗത്ത് വില്‍പ്പന നടത്തിയതായി പോലിസിന് വിവരം ലഭിച്ചിട്ടുണ്ട്. ഒരു ബൈക്ക് 4000-5000 രൂപക്കാണ് വിറ്റിരുന്നത്. ഇവരെ ചോദ്യം ചെയ്തതില്‍ നിന്ന് ലഭിച്ച വിവരത്തിന്റെ അടിസ്ഥാനത്തില്‍ കോടഞ്ചേരിയില്‍ വച്ച് ഒരു മോഷ്ടാവിനെയും ബൈക്കുമായി പിടികൂടിയിട്ടുണ്ട്. അറസ്റ്റിലായ രണ്ടുപേര്‍ ചേര്‍ന്ന് എട്ടു ബൈക്കുകള്‍ മോഷ്ടിച്ചതിന്റെ വിവരങ്ങള്‍ പൊലിസിന് ലഭിച്ചിട്ടുണ്ട്.