കണ്ണൂര്‍: കണ്ണൂര്‍ അക്കാദമി ഫോര്‍ കോംപറ്റിറ്റീവ് എക്‌സാമിനേഷന്റെ (കെയ്‌സ്) നേതൃത്വത്തില്‍ ഐ.എ.എസ്, ഐ.പി.എസ്, ഐ.എഫ്.എസ്, ഐ.ആര്‍.എസ് തുടങ്ങിയ 24 അഖിലേന്ത്യാ സര്‍വിസുകളിലേക്കും കേന്ദ്ര സര്‍വിസിലേക്കുമുള്ള 2017ലെ യോഗ്യതാ പരിക്ഷയ്ക്കു തയാറെടുക്കുന്ന ഉദ്യോഗാര്‍ഥികള്‍ക്കു മാര്‍ഗനിര്‍ദേശം നല്‍കുന്നതിനായി എട്ടിനു രാവിലെ 9.30ന് നോര്‍ത്ത് മലബാര്‍ ചേംബര്‍ ഹാളില്‍ ഏകദിന ശില്‍പശാല നടത്തും. കെയ്‌സ് ഉദ്ഘാടനം പൊതുവിദ്യാഭ്യാസ സെക്രട്ടറി എ.പി.എം മുഹമ്മദ് ഹനീഷും ശില്‍പശാല ഉദ്ഘാടനം ഐ.ജി ദിനേന്ദ്ര കശ്യപും നിര്‍വഹിക്കും. കണ്ണൂര്‍ സര്‍വകലാശാലാ വൈസ് ചാന്‍സലര്‍ ഡോ. എം.കെ അബ്ദുല്‍ ഖാദര്‍ മുഖ്യപ്രഭാഷണം നടത്തും. കലക്ടര്‍ മിര്‍ മുഹമ്മദലി മുഖ്യതിഥിയാകും. മോട്ടിവേഷന്‍ സെഷനു കോഴിക്കോട് പി.എം ഫൗണ്ടേഷന്‍ സിവില്‍ സര്‍വിസ് കേന്ദ്രം അക്കാദമിക് ഹെഡ് കെ.പി ആസിഫ് നേതൃത്വം നല്‍കും. സാമ്പത്തികമായി പിന്നോക്കം നില്‍ക്കുന്ന യുവതീ യുവാക്കള്‍ക്കു മുന്‍ഗണന നല്‍കിയായിരിക്കും സെന്റര്‍ പ്രവര്‍ത്തിക്കുകയെന്നു കെയ്‌സ് ചെയര്‍മാന്‍ പി കമാല്‍കുട്ടി, സെക്രട്ടറി എ അബ്ദുല്‍ റഫീഖ്, ട്രഷറര്‍ വി.എന്‍ മുഹമ്മദലി, ഫിറോസ് എന്നിവര്‍ അറിയിച്ചു.