തൊട്ടില്‍പ്പാലം: കേന്ദ്രം ഭരിക്കുന്ന മോദിയുടെ ഭരണത്തിലും കേരളത്തില്‍ യു.ഡി.എഫ് നേതൃത്വം നല്‍കുന്ന ഉമ്മന്‍ ചാണ്ടി ഭരണത്തിലും സ്ത്രീപീഡനവും കുറ്റകൃത്യങ്ങളും വര്‍ധിച്ചുവെന്ന് സി.പി.എം കേന്ദ്ര കമ്മിറ്റിയംഗം സുധാ സുന്ദര്‍രാമന്‍. എല്‍.ഡി.എഫ് കാവിലുംപാറ പഞ്ചായത്ത് തെരഞ്ഞെടുപ്പ് റാലി ഉദ്ഘാടനം ചെയ്തു സംസാരിക്കുകയായിരുന്നു അവര്‍. പെരുമ്പാവൂരിലെ നിയമ വിദ്യാര്‍ഥിനി ജിഷയുടെ ദാരുണ മരണം സ്വന്തം വീട്ടില്‍ പോലും സ്ത്രീകള്‍ക്ക് രക്ഷയില്ലെന്ന് തെളിയിക്കുന്നതാണ്. സംഭവം നടന്നിട്ട് ദിവസങ്ങള്‍ കഴിഞ്ഞിട്ടും പ്രതികളെ നിയമത്തിന് മുന്നില്‍ കൊണ്ടണ്ടുവരാന്‍ സര്‍ക്കാരിന് കഴിഞ്ഞിട്ടില്ലെന്നും സുന്ദര്‍രാമന്‍ പറഞ്ഞു. നരേന്ദ്ര മോദി അധികാരത്തില്‍ വന്നതിനു ശേഷം സമൂഹത്തില്‍ അസമത്വം വര്‍ധിക്കുന്നതായും കേരളത്തിലെത്തി ഗുജ്‌റാത്ത് മോഡല്‍ ആഹ്വാനത്തിലൂടെ വംശഹത്യയുടെ നാടായിമാറ്റുമെന്ന് സംശയിക്കേണ്ടിയിരിക്കുന്നുവെന്നും സുധാ സുന്ദര്‍രാമന്‍ കൂട്ടിച്ചേര്‍ത്തു. പരിപാടിയില്‍ പി.ജി ജോര്‍ജ് മാസ്റ്റര്‍ അധ്യക്ഷനായി. കെ.പി കുഞ്ഞമ്മദ്കുട്ടി, സി.എന്‍ ചന്ദ്രന്‍, അഡ്വ. കെ. സമദ്, ജംഷീര്‍ അലി, ടി.കെ രാജന്‍, കെ. കൃഷ്ണന്‍, എം. ബാലന്‍, വി.കെ സുരേന്ദ്രന്‍, എ.എം റഷീദ് കാനത്തില്‍ ജമീല, രജീന്ദ്രന്‍ കപ്പള്ളി, രാജു തോട്ടിന്‍ചിറ സംസാരിച്ചു.