മണ്ണാര്‍ക്കാട്: അനധികൃത കോഴി ഫാമുകള്‍ ജനത്തിന് ദുരിതമാവുന്നു. തിരുവിഴാംകുന്ന്, കോട്ടോപ്പാടം പ്രദേശത്ത് ജനവാസ മേഖലകളില്‍ നൂറുകണക്കിന് ഫാമുകളാണ് പ്രവര്‍ത്തിക്കുന്നത്.
ഫാമുകളില്‍ നിന്ന് വരുന്ന ദുര്‍ഗന്ധം കാരണം പ്രദേശവാസികള്‍ ഏറെ ദുരിതത്തിലാണ് കഴിയുന്നത്. പൊലൂഷന്‍ കണ്‍ട്രോള്‍ ബോര്‍ഡിന്റെ അനുമതിയൊ, ഗ്രാമപഞ്ചായത്തിന്റെ ലൈസന്‍സൊയില്ലാതെയാണ് ഫാമുകള്‍ പ്രവര്‍ത്തിക്കുന്നതെന്ന ആക്ഷേപവുമുയര്‍ന്നിട്ടുണ്ട്.
ഫാമില്‍ ചത്ത കോഴികളെ പോലും സംസ്‌കരിക്കാനുളള സംവിധാനമില്ലാത്തതു കാരണം ചത്തകോഴികളെ സമീപത്തെ തോട്ടിലും പുഴകളിലും റോഡരികുകളിലും തളളുന്നതായും പരാതി ഉയര്‍ന്നിട്ടുണ്ട്. പൊതുജനാരോഗ്യത്തിന് ഏറെ ഭീഷണിയായി നില്‍ക്കുന്ന ഇത്തരം ഫാമുകള്‍ക്കെതിരേ നടപടി സ്വീകരിക്കണമെന്നാവശ്യപ്പെട്ട് പ്രദേശവാസികള്‍ കോട്ടോപ്പാടം പഞ്ചായത്ത് സെക്രട്ടറിക്ക് പരാതി നല്‍കി.