കോഴിക്കോട്: കക്കോടി ചെറുകുളം റോഡില്‍ ബസ് വയലിലേക്ക് തലകീഴായി മറിഞ്ഞുണ്ടായ അപകടത്തില്‍ എട്ടു പേര്‍ക്ക് പരുക്ക്. അഞ്ച് വിദ്യാര്‍ഥികള്‍ക്കും മൂന്ന് സ്ത്രീകള്‍ക്കുമാണ് പരുക്കേറ്റത്.
 ഇന്നലെ രാവിലെ ആറേമുക്കാലോടെ പാര്‍ഥസാരഥി ബസ് സ്റ്റോപ്പിന് സമീപമാണ് സംഭവം. രാവിലെ നഗരത്തിലേക്ക് സര്‍വീസ് നടത്തുകയായിരുന്ന വിനായക എന്ന ബസ് എതിരേ വന്ന ഓട്ടോറിക്ഷയ്ക്ക് സൈഡ് നല്‍കുന്നതിനിടെ അപകടത്തില്‍പ്പെടുകയായിരുന്നു. നാട്ടുകാരാണ് രക്ഷാപ്രവര്‍ത്തനം നടത്തി ബസ്സില്‍ നിന്നും യാത്രക്കാരെ പുറത്തെടുത്തത്. അപകടത്തില്‍ നിസ്സാര പരുക്കേറ്റ ഏഴു പേരെ പ്രാഥമിക ചികിത്സ നല്‍കി വിട്ടയച്ചപ്പോള്‍ ഒരു സ്ത്രീയെ കോഴിക്കോട് ബീച്ച് ജനറല്‍ ആശുപത്രിയില്‍ പ്രവേശിപ്പിച്ചു.