ചെറുപുഴ: ടൗണിലൂടെ ഓടിക്കൊണ്ടിരിക്കെ കാറിന്റെ ടയര്‍ ഊരിത്തെറിച്ചു. ചെറുപുഴ ടൗണില്‍ ഇന്നലെ ഉച്ചക്ക് ഒന്നരയോടെയായിരുന്നു അപകടം. ചെമ്പേരി സ്വദേശിയായ മധ്യവയസ്‌കന്‍ കാറില്‍ കോലുവള്ളിയിലേക്ക് പോകുന്നതിനിടെ ജെ.എം.യു.പി സ്‌കൂളിന് മുന്നില്‍ വച്ച് പിന്‍ചക്രം ഊരിത്തെറിക്കുകയായിരുന്നു. ടയര്‍ നഷ്ടപ്പെട്ടിട്ടും കാര്‍ നൂറുമീറ്ററോളം ഓടി ബസ്സ്റ്റാന്‍ഡിലേക്ക് പ്രവേശിക്കുന്ന റോഡിലാണ് നിന്നത്. ടയറില്ലാതെ കാര്‍ ഓടുന്നതുകണ്ട് നാട്ടുകാര്‍ ബഹളം വച്ചപ്പോഴാണ് കാറുടമ സംഭവമറിഞ്ഞത്. ടൗണില്‍ ആള്‍തിരക്ക് കുറഞ്ഞ സമയമായതിനാല്‍ വലിയ അപകടം ഒഴിവായി.