മണ്ണഞ്ചേരി :അമിതവേഗതയിലെത്തിയ ടിപ്പര്‍ലോറിയില്‍നിന്നും സ്‌റ്റെപ്പിനിടയര്‍ തെറിച്ചുവീണ് കാര്‍ ഭാഗീകമായി തകര്‍ന്നു. ഇന്നലെ രാവിലെ 11 മണിക്ക് ദേശീയപാതയില്‍ വളവനാടുവച്ചായിരുന്നു അപകടം. പുന്നപ്ര സ്വദേശി ഖദീജയുടെ ഉടമസ്ഥതയിലുള്ള കാറിന്റെ മുന്‍ഭാഗത്താണ് ടയര്‍ പതിച്ചത്. കാറില്‍ സഞ്ചരിച്ചിരുന്ന ഖദീജയ്ക്ക് കാറിന്റെ ഗ്ലാസ് തറച്ച് കൈയ്ക്ക് പരിക്കേറ്റു.ഇവരുടെ മടിയിലിരുന്ന് രണ്ടുവയസുകാരിയായ ചെറുമകളുംയാത്രചെയ്തിരുന്നു. എറണാകുളത്തേയ്ക്ക് പോകുകയായിരുന്നു കാര്‍ യാത്രികര്‍. ടിപ്പര്‍ലോറി ആലപ്പുഴ ഭാഗത്തേയ്ക്കുസഞ്ചരിക്കുകയായിരുന്നുവെന്ന് ദൃക്‌സാക്ഷികള്‍ പറഞ്ഞു.ലോറിയുടെ മുകള്‍ ഭാഗത്തുനിന്നാണ് ടയര്‍ കാറിനുമുകളില്‍ വീണത്. വലിയ ശബ്ദത്തോടെയുള്ള അപകടം സംഭവിച്ചിട്ടും ടിപ്പര്‍ലോറി നിര്‍ത്താതെ പോയിരുന്നു.