വൈക്കം: ശ്രീനാരായണഗുരുവിന്റെ നമുക്ക് ജാതിയില്ലാ വിളംബരം ശതാബ്ദി ആഘോഷത്തിന്റെ ജില്ലാതല ഉദ്ഘാടനം ഇന്ന് രാവിലെ 10ന് മന്ത്രി പി തിലോത്തമന്‍ വൈക്കത്ത് നിര്‍വഹിക്കും. കെ.എന്‍.എന്‍ സ്മാരക എന്‍.എസ്.എസ് ഓഡിറ്റോറിയത്തില്‍ നടക്കുന്ന ചടങ്ങില്‍ സി.കെ ആശ എം.എല്‍.എ അധ്യക്ഷനായരിക്കും.
ചടങ്ങില്‍ ജോസ് കെ മാണി എം.പി മുഖ്യാതിഥി ആയിരിക്കും. സമ്മേളനത്തില്‍ പ്രൊഫ. എം.കെ സാനു ,സംസ്ഥാന ലൈബ്രറി കൗണ്‍സില്‍ സെക്രട്ടറി അഡ്വ. പി അപ്പുക്കുട്ടന്‍ എന്നിവര്‍ പ്രഭാഷണം നടത്തും. ജില്ലാ ഭരണകൂടവും ഇന്‍ഫര്‍മേഷന്‍-പബ്ലിക് റിലേഷന്‍സ് വകുപ്പും വിവിധ വകുപ്പുകളുടെയും സഹകരണത്തോടെ ഗാന്ധി ജയന്തി വാരം- സര്‍ക്കാരിന്റെ 100ദിനാഘോഷം എന്നിവയുടെ ഭാഗമായി നടത്തിയ മത്സരത്തില്‍ വിജയികളായവര്‍ക്ക് സമ്മാനദാനം കലക്ടര്‍ സി.എ ലത നിര്‍വഹിക്കും.
വൈക്കം നഗരസഭാ ചെയര്‍മാന്‍ അനില്‍ ബിശ്വാസ്, വൈക്കം ബ്ലോക്ക് പഞ്ചായത്ത് പ്രസിഡന്റ് വൈ. ജയകുമാര്‍, ഗ്രാമ പഞ്ചായത്ത് പ്രസിഡന്റുമാര്‍ തുടങ്ങിയവര്‍ പങ്കെടുക്കും.
ഉദ്ഘാടന ചടങ്ങുകള്‍ക്ക് മുന്നോടിയായി ചലച്ചിത്ര അക്കാദമിയുടെ നേതൃത്വത്തില്‍ കലാപരിപാടികള്‍ അവതരിപ്പിക്കും. സാമൂഹ്യ പ്രവര്‍ത്തക കൂടിയായ പി. കെ. മേദിനി ഗാനങ്ങള്‍ ആലപിക്കും.