കാസര്‍കോട്: ഓണ്‍ലൈന്‍ തട്ടിപ്പില്‍ കാസര്‍കോട്ടെ വീട്ടമ്മക്ക് 2,07 900 ലക്ഷം രൂപ നഷ്ടപ്പെട്ടു. കൂഡ്‌ലുവിലെ കെ. രതീഷിന്റെ ഭാര്യ സരിതയുടെ പണമാണ് നഷ്ടപ്പെട്ടത്. വീട്ടമ്മയുടെ പരാതിയില്‍ കാസര്‍കോട് ടൗണ്‍ പൊലിസ് കേസെടുത്ത് അന്വേഷണം തുടങ്ങി.
ഏതാനും ദിവസങ്ങള്‍ക്ക് മുന്‍പ് ഹരിയാനയിലെ നാഗ്പൂരില്‍ നിന്നാണ് വിളിക്കുന്നതെന്നും അഞ്ചു ലക്ഷം രൂപയുടെ സ്വര്‍ണം പകുതി വില നല്‍കിയാല്‍ കൊറിയര്‍ വഴി അയച്ച് തരാമെന്നും പറഞ്ഞ് സരിതയുടെ മൊബൈലിലേക്ക് വിളി വന്നിരുന്നു. പണം അയക്കേണ്ട അക്കൗണ്ട് നമ്പര്‍ സന്ദേശമായും ലഭിച്ചു. ഇതേ തുടര്‍ന്ന് മൂന്ന് തവണയായി സരിത 2,07 900 ലക്ഷം രൂപ മൊബൈലില്‍ സന്ദേശം ലഭിച്ച അക്കൗണ്ടിലേക്ക് അയച്ച് കൊടുത്തു.
എന്നാല്‍ പിന്നീട് സരിതക്ക് വിളി വന്ന ഫോണ്‍ സ്വിച്ച് ഓഫ് ചെയ്ത നിലയിലായതോടെ കബളിപ്പിക്കപ്പെട്ടതായി അറിയുകയായിരുന്നു. ഇതേ തുടര്‍ന്ന് കഴിഞ്ഞ ദിവസം കാസര്‍കോട് ടൗണ്‍ പൊലിസില്‍ പരാതി നല്‍കുകയാണുണ്ടായത്. ടൗണ്‍ പൊലിസിന്റെ നിര്‍ദേശത്തെ തുടര്‍ന്ന് കാസര്‍കോട് സൈബര്‍ സെല്ലും സംഭവത്തില്‍ അന്വേഷണം തുടങ്ങിയിട്ടുണ്ട്. മൊബൈലിലേക്ക് സന്ദേശങ്ങളയച്ചും വിളിച്ചും വീട്ടമ്മമാരെയും മറ്റും കബളിപ്പിക്കുന്ന സംഭവങ്ങള്‍ അടുത്ത കാലത്തായി കൂടിവരികയാണ്. നാണക്കേട് മൂലം പലരും പൊലിസില്‍ പരാതി നല്‍കുന്നില്ല. ഇത് തട്ടിപ്പ് സംഘത്തിന് സഹായകമാവുന്നതായാണ് വിവരം.