കരുളായി: കൃഷി ഭവനില്‍ നിന്നും തിരുവനന്തപുരം വിതുര ജെയ്‌സി ഫാമിലേക്ക് സ്ഥലം മാറി പോവുന്ന കരുളായി കൃഷി ഓഫീസര്‍ അജിത്ത് സിങിന് യാത്രയയപ്പ് നല്‍കി. കരുളായി കെ.എം ഹയര്‍ സെക്കന്‍ഡറി സ്‌കൂളില്‍ വിദ്യാര്‍ഥികളാണ് ജനകീയനായ കൃഷി ഓഫീസര്‍ക്ക് ഊഷ്മളമായ യാത്രയയപ്പ് നല്‍കിയത്.
തിരുവനന്തപുരത്ത് നിന്ന് കരുളായിയിലെത്തിയ അജിത്ത് സിങ് സ്‌കൂളിലാണ് ആദ്യമായി ജൈവ പച്ചക്കറി കൃഷിയ്ക്ക് തുടക്കം കുറിച്ചത്. കുട്ടികളുടെ പൂര്‍ണ പിന്തുണയോടെ സ്ഥാപന പച്ചക്കറി പദ്ധതിക്ക് സ്‌കൂളില്‍ തുടക്കംകുറിച്ചു. പിന്നീട് സ്‌കൂളിന് സംസ്ഥാന അവര്‍ഡുകളും നിരവധി ജില്ലാ അവാര്‍ഡുകളും കരസ്ഥമാക്കാനായി.
സ്‌കൂളില്‍ സംഘടിപ്പിച്ച ചടങ്ങില്‍ സ്‌കൂള്‍ മനേജര്‍ ടി.കെ മുഹമ്മദ് ഹാജി, പി.ടി.എ പ്രസിഡന്റ് ചന്ദ്രബാനു, പ്രധാനാധ്യാപകന്‍ സോണി അന്റണി, എം.കബീര്‍, ജെ.രാധാകൃഷ്ണന്‍ സംസാരിച്ചു.