തിരുവനന്തപുരം: തന്റെ സിനിമാജിവിതം തകര്‍ത്തതു മുഖ്യമന്ത്രി ഉമ്മന്‍ചാണ്ടിയാണെന്ന സുരേഷ് ഗോപി എം.പിയുടെ ആരോപണം വാര്‍ത്തയായതിനെ തുടര്‍ന്ന് ഉമ്മന്‍ചാണ്ടിക്ക് സാമൂഹ്യമാധ്യമങ്ങളില്‍ അഭിനന്ദന പ്രവാഹം. ഇതു ശരിയാണെങ്കില്‍ ഉമ്മന്‍ചാണ്ടി മലയാള സിനിമയ്ക്കു നല്‍കിയ വലിയൊരു സംഭാവനയാണെന്നു സാമൂഹ്യമാധ്യമങ്ങളില്‍ പ്രത്യക്ഷപ്പെടുന്ന പോസ്റ്റുകളില്‍ പറയുന്നു. അടിമാലിയില്‍ എന്‍.ഡി.എയുടെ തെരഞ്ഞെടുപ്പ് പ്രചാരണ പൊതുയോഗത്തിലായിരുന്നു ഉമ്മന്‍ചാണ്ടിക്കെതിരേ സുരേഷ് ഗോപിയുടെ പരാമര്‍ശങ്ങള്‍. 'ഞാന്‍ നരേന്ദ്രമോദിയെ കാണാന്‍ പോയത് ഏതെങ്കിലും രാഷ്ട്രീയത്തിന്റെ ഭാഗമായതുകൊണ്ടല്ല. കേരളത്തില്‍ വികസനമെത്തിക്കണമെന്ന് അഭ്യര്‍ഥിക്കാനായിരുന്നു. എന്നാല്‍ ഉമ്മന്‍ചാണ്ടിയും മറ്റു തല്‍പരകക്ഷികളും അതു മറ്റു രീതിയില്‍ അവതരിപ്പിച്ച് എന്റെ സിനിമാജീവിതം തകര്‍ത്തു. എനിക്ക് സിനിമാ ജീവിതം അവസാനിപ്പിക്കേണ്ടി വന്നു' ഇങ്ങനെയൊക്കെയായിരുന്നു പ്രസംഗം. ഇതു മാധ്യമങ്ങളെല്ലാം റിപ്പോര്‍ട്ട് ചെയ്തിരുന്നു. തുടര്‍ന്നാണ് സാമൂഹ്യമാധ്യമങ്ങളില്‍ പരിഹാസ പോസ്റ്റുകള്‍ നിറഞ്ഞത്. ഉമ്മന്‍ചാണ്ടി മലയാള സിനിമയ്ക്കു നല്‍കിയ മികച്ച സംഭാവന, ഉമ്മന്‍ചാണ്ടിക്ക് മലയാള സിനിമാ പ്രേമികളുടെ അഭിനന്ദനങ്ങള്‍, വാര്‍ത്ത ശരിയാണെങ്കില്‍ ഉമ്മന്‍ ചാണ്ടിക്ക് ഉമ്മ എന്നിങ്ങനെയൊക്കെയാണ് സാമൂഹ്യമാധ്യമങ്ങളിലെ പ്രതികരണങ്ങള്‍.