ഹരിപ്പാട്: രാഷ്ട്രീയ കേരളം ഉറ്റുനോക്കുന്ന വി.ഐ.പി മണ്ഡലമായ ഹരിപ്പാട് പ്രചാരണം പൊടിപാറുന്നു. ആഭ്യന്തരമന്ത്രി രമേശ് ചെന്നിത്തല ജനവിധി തേടുന്ന മണ്ഡലമെന്ന നിലയില്‍ ശ്രദ്ധിക്കപ്പെടുന്ന ഇവിടെ പ്രചരണം അവസാന ഘട്ടത്തിലേക്ക് കടന്നതോടെ പോരാട്ടവും കടുക്കുന്നു. സംസ്ഥാനത്തിന്റെ വിവിധ ഭാഗങ്ങളില്‍ പ്രചരണത്തിന് ശേഷം സ്വന്തം തട്ടകത്തിലെത്തിയ ചെന്നിത്തല പ്രചാരണം ഊര്‍ജിതമാക്കി കഴിഞ്ഞു. മണ്ഡലത്തിലെ ജനങ്ങളെ അടുത്തറിയാവുന്ന ചെന്നിത്തല കൂടുതല്‍ പ്രചാരണങ്ങള്‍ നടത്തിയിട്ടില്ലെങ്കിലും തികഞ്ഞ പ്രതീക്ഷയിലാണ്. കുടുംബസംഗമങ്ങള്‍ പൂര്‍ത്തിയാക്കി കഴിഞ്ഞു. വികസന പ്രവര്‍ത്തനങ്ങള്‍ സംബന്ധിച്ച കഥാപ്രസംഗ സി.ഡി എല്ലാ ബൂത്തുകളിലും എത്തിച്ച് പ്രദര്‍ശനവും തുടങ്ങി. അഞ്ച് വര്‍ഷത്തെ ഹരിപ്പാടിന്റെ വികസനം സമഗ്രമായി പ്രതിപാദിക്കുന്ന വികസനത്തിന്റെ അഞ്ച് വര്‍ഷം എന്ന പുസ്തകം എല്ലാ വീടുകളിലും വിതരണം ചെയ്തു തുടങ്ങി. ഇടത് പക്ഷജനാധിപത്യ മുന്നണി സ്ഥാനാര്‍ത്ഥി പി.പ്രസാദിന്റെ തിരഞ്ഞെടുപ്പ് പ്രചരണത്തിന്റെ നാലാം ഘട്ടം ് ആരംഭിച്ചു. ആദ്യഘട്ടത്തില്‍ പരമാവധി വോട്ടര്‍മാരെ നേരിട്ട് കാണുകയും ഇരുപത് പൊതുയോഗങ്ങള്‍ സംഘടിപ്പിക്കുകയും ചെയ്തു. രണ്ടാംഘട്ടത്തില്‍ മണ്ഡലത്തിലെ വികസന പൊള്ളത്തരങ്ങളെ പ്രതിപാദിക്കുന്ന കുറ്റപത്ര സമര്‍പ്പണ യോഗങ്ങള്‍ നടന്നു. 18 കേന്ദ്രങ്ങളിലായി 55 ഓളം യോഗങ്ങള്‍ നടത്തി. എല്‍.ഡി.എഫിന്റെയും സ്ഥാനാര്‍ത്ഥിയുടെയും അഭ്യര്‍ത്ഥനകള്‍ വീടുകളില്‍ എത്തിച്ചു. 150 ഓളം കുടുംബയോഗങ്ങള്‍ നടന്നു. ഇന്നലെ ആറാട്ടുപുഴയിലെ മത്സ്യ തൊഴിലാളി, സുനാമി കോളനികള്‍ സന്ദര്‍ശിക്കുകയും മൂന്ന് പൊതുയോഗങ്ങള്‍ നടത്തുകയും ചെയ്തു. എന്‍.ഡി.എ സ്ഥാനാര്‍ഥി ഡി.അശ്വിനിദേവ് പരമാവധി വോട്ടര്‍മാരെ നേരില്‍ കാണ്ടാണ് വോട്ട് അഭ്യര്‍ത്ഥിക്കുന്നത്. പാര്‍ട്ടിയുടെ ലഘുലേഖ എല്ലാ വീടുകളിലും എത്തിച്ചു. ബൂത്ത്, പഞ്ചായത്ത്, മണ്ഡലം കണ്‍വന്‍ഷനുകളും ബൂത്ത് സമ്മേളനങ്ങളും പൂര്‍ത്തീകരിച്ചു.