മട്ടന്നൂര്‍: മട്ടന്നൂര്‍ നഗരസഭ സംഘടിപ്പിച്ച വിദ്യാരംഭം ചടങ്ങിന് ആദ്യാക്ഷരം കുറിക്കാന്‍ ജാതി മതദമന്യേ നൂറുകണക്കിനു കുരുന്നുകള്‍. ഗവ. യു.പി സ്‌കൂളില്‍ സംഘടിപ്പിച്ച വിദ്യാരംഭം കഥാകൃത്ത് എന്‍ ശശിധരന്‍ ഉദ്ഘാടനം ചെയ്തു. നഗരസഭാ ചെയര്‍മാന്‍ കെ ഭാസ്‌കരന്‍ അധ്യക്ഷനായി. കെ.പി എ റഹീം, ഫാ. തോമസ് തൈത്തോട്ടം, ഡോ. ജി കുമാരന്‍ നായര്‍, ഡോ. സുമിത നായര്‍, പി.കെ ഗോവിന്ദന്‍, കൃഷ്ണകുമാര്‍ കണ്ണോത്ത്, കെ.എ വാസുദേവന്‍ നമ്പൂതിരി എന്നിവര്‍ കുരുന്നുകള്‍ക്ക് ആദ്യാക്ഷരം പകര്‍ന്നുനല്‍കി.
വിവിധ മതത്തില്‍പെട്ട ഇരുന്നൂറോളം കുട്ടികളാണ് മാതാപിതാക്കളോടോപ്പം എത്തിയത്. മുഴുവന്‍ കുട്ടികള്‍ക്കും നഗരസഭ പുസ്തക കിറ്റും മധുരവും ഫോട്ടോ പതിച്ച സര്‍ട്ടിഫിക്കറ്റും നല്‍കി.