മെരിഡ: ലാറ്റിനമേരിക്കന്‍ ലോകകപ്പ് യോഗ്യതാ പോരാട്ടത്തില്‍ മുന്‍ ചാംപ്യന്‍മാരായ ബ്രസീലിനു ജയം. ജയത്തോടെ അവര്‍ പോയിന്റ് പട്ടികയില്‍ ഒന്നാം സ്ഥാനത്തെത്തി. അതേസമയം മറ്റൊരു മുന്‍ ചാംപ്യന്‍മാരായ അര്‍ജന്റീനയ്ക്ക് ഞെട്ടിക്കുന്ന തോല്‍വി പിണഞ്ഞു. പരാഗ്വെയാണ് അര്‍ജന്റീനയെ അട്ടിമറിച്ചത്. മറ്റു മത്സരങ്ങളില്‍ ചിലി, പെറുവിനെ പരാജയപ്പെടുത്തി. ബൊളീവിയ- ഇക്വഡോര്‍, കൊളംബിയ- ഉറുഗ്വെ മത്സരങ്ങള്‍ സമനിലയില്‍ അവസാനിച്ചു.
പാല്‍മിറസിന്റെ 19കാരനായ ഗബ്രിയേല്‍ ജീസസ്, വില്ല്യന്‍ എന്നിവര്‍ നേടിയ ഗോളുകളില്‍ വെനസ്വലയെ 2-0ത്തിനാണ് ബ്രസീല്‍ കീഴടക്കിയത്. ഇരു പകുതികളിലായാണ് ഗോളുകള്‍ പിറന്നത്. കളി തുടങ്ങി എട്ടാം മിനുട്ടില്‍ തന്നെ ബ്രസീല്‍ മുന്നില്‍ കടന്നു. വെനസ്വലന്‍ ഗോളി മധ്യഭാഗത്തേക്ക് നല്‍കിയ പന്ത് പിടിച്ചെടുത്ത് ഗബ്രിയേല്‍ ജീസസ് വല ചലിപ്പിക്കുകയായിരുന്നു. രണ്ടാം പകുതി തുടങ്ങി 53ാം മിനുട്ടില്‍ വില്ല്യന്‍ പട്ടിക തികച്ചു. നെയ്മര്‍ സസ്പന്‍ഷനെ തുടര്‍ന്നു മത്സരിക്കാനിറങ്ങിയില്ല.
സൂപ്പര്‍ താരം ലയണല്‍ മെസ്സി ഇല്ലാതെ ഇറങ്ങിയ അര്‍ജന്റീനയെ അവരുടെ മണ്ണില്‍ വച്ച് പരാഗ്വെ അട്ടിമറിച്ചു. മറുപടിയില്ലാത്ത ഒറ്റ ഗോളിനാണ് അര്‍ജന്റീന തോല്‍വി വഴങ്ങിയത്. മാഞ്ചസ്റ്റര്‍ സിറ്റി താരം സെര്‍ജിയോ അഗ്യെറോ പെനാല്‍റ്റി നഷ്ടപ്പെടുത്തിയതോടെ അവരുടെ തകര്‍ച്ച പൂര്‍ണമായി. കഴിഞ്ഞ മൂന്നു മത്സരങ്ങളില്‍ രണ്ടു സമനിലയും ഒരു തോല്‍വിയുമായി അര്‍ജന്റീനയുടെ നില കൂടുതല്‍ പരുങ്ങലിലായി. കളിയുടെ 18ാം മിനുട്ടില്‍ ഡെരില്‍ ഗോണ്‍സാലസാണ് പരാഗ്വെയുടെ വിജയ ഗോള്‍ നേടിയത്.
ആര്‍ദുറോ വിദാല്‍ നേടിയ ഇരട്ട ഗോളുകളുടെ മികവില്‍ കോപ്പ അമേരിക്ക ചാംപ്യന്‍മാരായ ചിലി സ്വന്തം തട്ടകത്തില്‍ പെറുവിനെ 2-1നു വീഴ്ത്തി. കളിയുടെ പത്താം മിനുട്ടില്‍ വിദാല്‍ ആദ്യ ഗോളിലൂടെ ചിലിയെ മുന്നില്‍ കടത്തി. 76ാം മിനുട്ടില്‍ ഫ്‌ളോറസിലൂടെ പെറു സമനില പിടിച്ചെങ്കിലും 85ാം മിനുട്ടില്‍ വിദാല്‍ ചിലിക്ക് ജയം സമ്മാനിക്കുകയായിരുന്നു.
കരുത്തന്‍മാരായ കൊളംബിയ- ഉറുഗ്വെ ടീമുകള്‍ നേര്‍ക്കുനേര്‍ വന്ന മത്സരം 2-2നു സമനിലയില്‍ അവസാനിച്ചു. 15ാം മിനുട്ടില്‍ അഗ്യുലാറിലൂടെ കൊളംബിയ ആദ്യം ലീഡെടുത്തപ്പോള്‍ ക്രിസ്റ്റ്യന്‍ റോഡ്രിഗസിലൂടെ ഉറുഗ്വെ സമനില പിടിച്ചു. സൂപ്പര്‍ താരം ലൂയീസ് സുവാരസ് 73ാം മിനുട്ടില്‍ ഉറുഗ്വെയെ മുന്നില്‍ കടത്തിയെങ്കിലും മിന 84ാം മിനുട്ടില്‍ നേടിയ ഗോളില്‍ കൊളംബിയ സമനില സ്വന്തമാക്കുകയായിരുന്നു. ബൊളീവിയ- ഇക്വഡോര്‍ മത്സരവും 2-2നു സമനിലയില്‍ അവസാനിച്ചു.
പത്തു മത്സരങ്ങളില്‍ നിന്നു ആറു വിജയങ്ങളും മൂന്നു സമനിലകളുമായി ബ്രസീല്‍ 21 പോയിന്റോടെ ഒന്നാം സ്ഥാനത്ത്. ഇത്രയും കളികളില്‍ നിന്നു ആറു ജയവും രണ്ടു സമനിലയുമായി ഉറുഗ്വെ 20 പോയിന്റോടെ രണ്ടാം സ്ഥാനത്ത്. ഇക്വഡോര്‍ മൂന്നാം സ്ഥാനത്തും കൊളംബിയ നാലാം സ്ഥാനത്തും നില്‍ക്കുന്നു. പത്തുകളികളില്‍ നിന്നു നാലു വീതം ജയവും സമനിലയുമായി അര്‍ജന്റീന 16 പോയിന്റുമായി അഞ്ചാം സ്ഥാനത്ത്. പരാഗ്വെ, ചിലി ടീമുകള്‍ ആറും ഏഴും സ്ഥാനത്ത്.