കോഴിക്കോട്: ഇന്നു നടത്താനിരുന്ന കോഴിക്കോട് ജില്ലാ കോണ്‍ഗ്രസ് കമ്മിറ്റിയുടെ രാഷ്ട്രീയ വിശദീകരണയോഗം 21ന് നടക്കുമെന്ന് ഡി.സി.സി പ്രസിഡന്റ് കെ.സി അബു വാര്‍ത്താസമ്മേളനത്തില്‍ അറിയിച്ചു. ബി.ജെ.പി ഹര്‍ത്താല്‍ പ്രഖ്യാപിച്ചതിനെ തുടര്‍ന്നാണ് യോഗം മാറ്റിയത്. വൈകിട്ട് അഞ്ചിന് കോഴിക്കോട് മുതലക്കുളം മൈതാനിയില്‍ നടക്കുന്ന യോഗം മുന്‍മുഖ്യമന്ത്രി ഉമ്മന്‍ ചാണ്ടി ഉദ്ഘാടനം ചെയ്യും.
'ലൈഫ് ബോയ് എവിടെയോ, അവിടെയാണ് ആരോഗ്യം' എന്ന പരസ്യവാചകം പോലെ സി.പി.എം എന്ന് അധികാരത്തിലുണ്ടോ അന്നു രാഷ്ട്രീയ കൊലപാതകങ്ങള്‍ പതിവാകുന്ന സാഹചര്യമാണ്. 'കൊലയ്ക്ക് കൊല, ചോരയ്ക്ക് ചോര' എന്ന രാഷ്ട്രീയം നാടിന് ചേര്‍ന്നതല്ലെന്ന് സി.പി.എം ഇനിയെങ്കിലും മനസിലാക്കണമെന്നും കെ.സി അബു കൂട്ടിച്ചേര്‍ത്തു.
വാര്‍ത്താസമ്മേളനത്തില്‍ യൂത്ത് കോണ്‍ഗ്രസ് മുന്‍സംസ്ഥാന പ്രസിഡന്റ് അഡ്വ. ടി. സിദ്ദീഖ്, ഡി.സി.സി ജനറല്‍ സെക്രട്ടറിമാരായ രമേശ് നമ്പിയത്ത്, ദിനേശ് പെരുമണ്ണ പങ്കെടുത്തു.