എടപ്പാള്‍: കൂറ്റനാട് കെ.വി ഉസ്താദ് പതിനാറാമത് ഉറൂസ് മുബാറകും മാണൂര്‍ ദാറുല്‍ ഹി ദായ ദഅ്‌വാ കോളജ് മൂന്നാമത് സനദ്ദാന സമ്മേളനവും ഇന്നും നാളെയുമായി മാണൂര്‍ ദാറുല്‍ ഹിദായ ദഅ്‌വ കോളജില്‍ നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു.
ഇന്ന് വൈകീട്ട് എടപ്പാള്‍ അങ്ങാടി ജുമാമസ്ജിദ് പരിസരത്ത് നടക്കുന്ന കെ.വി ഉസ്താദ് മഖാം സിയാറത്തോടുകൂടി പരിപാടിക്ക് തുടക്കം കുറിക്കും. വൈകീട്ട് അഞ്ചിന് എം.വി ഇസ്മാഈല്‍ മുസ്‌ലിയാരുടെ നേതൃത്വത്തില്‍ മാണൂര്‍ ദാറുല്‍ ഹിദായ ദഅ് വ കോളജില്‍ ഖത്മുല്‍ ഖുര്‍ആന്‍ മജ്‌ലിസ് നടക്കും. വൈകീട്ട് ഏഴിന് സയ്യിദ് കെഎസ്‌കെ തങ്ങള്‍ മുഖൈബിലി തങ്ങളുടെ അധ്യക്ഷതയില്‍ നടക്കുന്ന മജ്‌ലിസുന്നൂര്‍ അനുസ്മരണ ദുആ സംഗമം പി.വി.എം കുട്ടി ഫൈസി കറുകത്തിരുത്തി ഉദ്ഘാടനം ചെയ്യും. പുറങ്ങ്.കെ.അബ്ദുള്ള മുസലിയാര്‍ അനുസ്മരണ പ്രഭാഷണം നടത്തും. എം.വി ഇസ്മാഈല്‍ മുസലിയാര്‍ പ്രാര്‍ത്ഥനക്ക് നേതൃത്വം നല്‍കും. റഹ്മത്തുള്ള ഖാസിമി മൂത്തേടം മുഖ്യപ്രഭാഷണം നടത്തും.
നാളെ വൈകീട്ട് മൂന്നിന് പൂര്‍വ്വ വിദ്യാര്‍ഥി സംഗമം നടക്കും. രാത്രി ഏഴിന് നടക്കുന്ന സനദ്ദാന സമാപന സമ്മേളനം പാണക്കാട് സയ്യദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. കോട്ടുമല ടി.എം ബാപ്പു മുസ്‌ലിയാര്‍ അധ്യക്ഷനാകും. ദഅ്‌വാ കോളേജില്‍ നിന്നു ബിരുദം പൂര്‍ത്തിയാക്കിയ മുപ്പത് യുവ പണ്ഡിതര്‍ക്കുള്ള സനദ് ദാനം നിര്‍വഹിക്കും. ദാറുല്‍ ഹുദ വൈസ് ചാന്‍സിലര്‍ ഡോ. ബഹാഉദ്ദീന്‍ മുഹമ്മദ് നദ് വി സനദ് ദാന പ്രഭാഷണം നടത്തും.
അബ്ദുള്‍ ജലീല്‍ റഹ്മാനി വാണിയന്നൂര്‍ മുഖ്യപ്രഭാഷണം നടത്തും. ഹാജി കെ മമ്മദ് ഫൈസി, കെ.വി മുഹമ്മദ് അയിലക്കാട്, ഡോ. സി.പി ബാവാഹാജി, കുഞ്ഞുമുഹമ്മദ് ഹാജി ബഹറൈന്‍ തുടങ്ങിയവര്‍ പങ്കെടുക്കും.
വാര്‍ത്താസമ്മേളനത്തില്‍ സി.എം ബഷീര്‍ ഫൈസി ആനക്കര, കാസിം ഫൈസി പോത്തന്നൂര്‍, അബ്ദുള്‍ ഖാദര്‍ കൈനിക്കര, എം.വി ഇസ്മാഈല്‍ മുസലിയാര്‍, അബ്ദുല്‍ ഖാദര്‍ ബാഖവി, മുത്തലിബ്, മുസ്തഫ തുടങ്ങിയവര്‍ സംബന്ധിച്ചു.