കാഞ്ഞങ്ങാട്: ഹര്‍ത്താല്‍ മൂലം വലഞ്ഞ യാത്രക്കാരെ ലക്ഷ്യസ്ഥാനത്തെത്തിച്ച് പൊലിസ് മാതൃകയായി. കാസര്‍കോട് നഗരത്തില്‍ പലയിടങ്ങളില്‍ കുടുങ്ങിപ്പോയ യാത്രക്കാരെയാണ് പൊലിസ് വാഹനത്തില്‍ ആവശ്യമുള്ള സ്ഥലങ്ങളിലെത്തിച്ചത്. കൊച്ചി എയര്‍പോര്‍ട്ടിലെത്തേണ്ട യാത്രക്കാരനും പൊലിസ് സഹായം അനുഗ്രഹമായി. കാഞ്ഞങ്ങാട് സ്വദേശി കെ.വി ഷെരീഫിനെയാണ് പൊലിസ് സഹായിച്ചത്. കെ.എസ്.ആര്‍.ടി.സി ബസുകള്‍ പോലും അപൂര്‍വമായി മാത്രം ഓടിയതിനാല്‍ പൊലിസിന്റെ സഹായം യാത്രക്കാര്‍ക്ക് ഏറെ ഗുണം ചെയ്തു.