കണ്ണൂര്‍: കണ്ണൂരിലെ സിംഹമെന്നറിയപ്പെട്ട എം.വി രാഘവന്റെ ശിഷ്യനായിരുന്നു ഇ.പി ജയരാജന്‍. രാഘവന്റെ കളരിയില്‍ നിന്നു രാഷ്ട്രീയമഭ്യസിച്ചവരായിരുന്നു പിണറായിയും കോടിയേരിയും ഇ.പിയുമൊക്കെ. രാഘവന്റെ മാനറിസങ്ങളായ അക്രമാസക്തമായ പ്രസംഗശൈലിയും എതിരാളികളോടുള്ള പരിഹാസവും ശിഷ്യരിലേക്കും പകര്‍ന്നുകിട്ടി. അണികള്‍ക്ക് ഏറെ എരിവേകിയിരുന്നു എം.വി.ആറിന്റെ നീട്ടിയും കുറുക്കിയുമുള്ള പ്രസംഗം. എം.വി.ആറിന്റെ സംഘാടകമികവ് ഹൃദയത്തിലേറ്റുവാങ്ങിയവരായിരുന്നു ശിഷ്യന്‍മാര്‍. അതുകൊണ്ടുതന്നെ സി.പി.എമ്മെന്ന മഹാമേരുവിലേക്ക് രാഘവശിഷ്യരുടെ പ്രയാണവും അതിവേഗത്തിലായി. ദീര്‍ഘവീക്ഷണമുള്ള രാഷ്ട്രീയ നേതാവായിരുന്നു എം.വി.ആര്‍. ഇം.എം.എസിന്റെ മുന്നില്‍പോലും എം.വി.ആര്‍ തലകുനിക്കാതെ ധാര്‍ഷ്ട്യവും ധിക്കാരവും ചേര്‍ന്ന തലയെടുപ്പോടെ നിന്നു. ബദല്‍രേഖ വിവാദത്തില്‍ രാഘവന്‍ പാര്‍ട്ടിക്കു പടിയിറങ്ങിയപ്പോള്‍ മൂസാന്‍കുട്ടിയും പാട്യം രാജനുമടങ്ങുന്ന വലിയൊരുവിഭാഗം കൂടെപ്പോയി. അന്നു പാര്‍ട്ടിയെ താങ്ങിനിര്‍ത്തിയത് ശിഷ്യനായ പിണറായിയുടെ നേതൃത്വത്തിലായിരുന്നു. മിത്രമായ രാഘവന്‍ ശത്രുവായി കെ കരുണാകരന്റെ തണലില്‍ പാര്‍ട്ടിക്കു നേരെ തിരിഞ്ഞപ്പോള്‍ സ്വന്തം ഗുരുവിനെ പല്ലും നഖവുമുപയോഗിച്ചു എതിര്‍ക്കാന്‍ മുന്‍പന്തിയില്‍  ജയരാജനുണ്ടായിരുന്നു.
1987ല്‍ അഴീക്കോടു നിന്നും എം.വി.ആറിനോടു പൊരുതിതോറ്റെങ്കിലും 1991ല്‍ ജയിച്ചു. കണ്ണൂര്‍ ജില്ലയിലെ സഹകരണ പ്രസ്ഥാനങ്ങളെ കേരളമാകെ വളര്‍ത്തിയ സഹകാരികളിലൊരാളാണ് ജയരാജന്‍. സഹകരണ ബാങ്കുകളും മറ്റു സ്ഥാപനങ്ങളും വഴി പാര്‍ട്ടി വളര്‍ത്താമെന്നു കാണിച്ചുകൊടുത്തത് എം.വി രാഘവനാണ്. ജയരാജന്റെ നേതൃത്വത്തില്‍ അതു കൂടുതല്‍ വി പുലമാക്കി. കണ്ണൂരിലെ എ.കെ.ജി സഹകരണ ആശുപത്രിയടക്കമുള്ള നിരവധി സ്ഥാപനങ്ങള്‍ ഉത്തമദൃഷ്ടാന്തമാണ്. ബദല്‍രേഖവിവാദമുയര്‍ത്തി പാര്‍ട്ടിക്കു പുറത്തു പോയ എം.വി.ആറിന് ഒരിക്കലും മാപ്പു കൊടുക്കാന്‍ ഇ.പി തയാറായില്ല. എം.വി ആറിന്റെ തളര്‍ച്ചവരെ എതിര്‍പ്പിന്റെ മഞ്ഞുരുകിയില്ല. എം.വി.ആര്‍ പാര്‍ട്ടിവിട്ടത് സി.പി.എം സംസ്ഥാന സെക്രട്ടറിയേറ്റമംഗമായിരിക്കെയാണെങ്കില്‍ ഇ.പിയും നടപടിക്കു വിധേയനാകുന്നത് സെക്രട്ടറിയേറ്റംഗമായിരിക്കെ തന്നെയാണ്.