ചേര്‍ത്തല: സ്‌കൂള്‍ കുട്ടികള്‍ക്ക് ലഹരിസാധനങ്ങള്‍ എത്തിച്ചിരുന്ന രണ്ട് യുവാക്കളെ കഞ്ചാവുമായി എക്‌സൈസ് പോലീസ് പിടികൂടി.
തൈക്കാട്ടുശ്ശേരി ചിറയ്ക്കല്‍ ശിവന്റെ മകന്‍ അക്ഷയ് (21)നെയും അരൂര്‍ സ്വദേശി ദിലീപിനെയുമാണ് പോലീസ് പിടികൂടി കോടതിയില്‍ ഹാജരാക്കിയത്.
അക്ഷയ്‌നെ തൈക്കാട്ടുശ്ശേരി ചിറയ്ക്കല്‍ പാലത്തിന് സമീപംവെച്ച് 24ഗ്രാം കഞ്ചാവുമായാണ് പിടികൂടിയത്. സ്‌കൂള്‍ കുട്ടികള്‍ക്ക് കഞ്ചാവ് എത്തിക്കുന്നതില്‍ ഇടനിലക്കാരനായ കച്ചവടക്കാരനാണ് അക്ഷയ്. ദിലീപിനെ ചേര്‍ത്തല ശ്രീനാരായണ മെമ്മോറിയല്‍ ഗവ.ഹയര്‍സെക്കന്ററി സ്‌കൂളിന് മുന്നില്‍വെച്ച് 11ഗ്രാം കഞ്ചാവുമായാണ് പിടികൂടിയത്.
രണ്ടുപേരുടെ പേരിലും എന്‍ഡിപിഎസ് നിയമപ്രകാരം കേസുകള്‍ രജിസ്റ്റര്‍ ചെയ്തു. ഇവര്‍ക്ക് കഞ്ചാവ് എത്തിച്ചിരുന്ന സംഘത്തെകുറിച്ച് എക്‌സൈസ് വകുപ്പ് അന്വേഷണം ആരംഭിച്ചിട്ടുണ്ട്.
ചേര്‍ത്തല റെയിഞ്ച് ഇന്‍സ്‌പെക്ടര്‍ കെ.ലാല്‍കുമാര്‍, പ്രിവന്റിവ് ഓഫീസര്‍ ഫെമിന്‍, സി.വി വേണു, കെ.വി അശോകന്‍, സന്തോഷ്.എസ്, സജിമോന്‍.എം.കെ, ബിജുലാല്‍ റെയ്ഡിന് നേതൃത്വം നല്‍കി.