തിരുവമ്പാടി: താഴെ തിരുവമ്പാടി പയ്യടിമുക്കില്‍ വീട്ടില്‍ അതിക്രമിച്ചു കയറി പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ചെന്ന പരാതിയില്‍ യുവാവിനെ പൊലിസ് അറസ്റ്റ് ചെയ്തു. 16കാരിയായ പെണ്‍കുട്ടിയെ ഉമ്മയും വലിയുമ്മയും പണിക്കുപോയ സമയം നോക്കി യുവാവ് വീട്ടില്‍ അതിക്രമിച്ചു കയറി പീഡിപ്പിച്ചെന്നാണു പരാതി. പരാതിയുടെ അടിസ്ഥാനത്തില്‍ തൊണ്ടിമ്മല്‍ സ്വദേശി മുണ്ടോംപൊയില്‍ ജിജു(27)വിനെ താമരശ്ശേരി സി.ഐയുടെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തു.
ബഹളം വച്ചപ്പോള്‍ കഴുത്തില്‍ ഷാള്‍ മുറുക്കി കൊന്നുകളയുമെന്നു ഭീഷണിപ്പെടുത്തിയതായും പെണ്‍കുട്ടിയുടെ മൊഴിയില്‍ പറയുന്നു. വിവരം പുറത്തറിഞ്ഞാല്‍ കൊന്നുകളയുമെന്നും ഭീഷണിപ്പെടുത്തിയതിനാല്‍ ഭയംമൂലം ആരോടും പറഞ്ഞില്ലെന്നും പിന്നീടു പലതവണ സംഭവം ആവര്‍ത്തിച്ചെന്നും പരാതിയില്‍ പറയുന്നുണ്ട്. പ്രതിയെ ഇന്നു ജില്ലാ കോടതിയില്‍ ഹാജരാക്കുമെന്ന് തിരുവമ്പാടി പൊലിസ് അറിയിച്ചു.